काठमाडौं । नेपाली महिला क्रिकेट टोली १३ औँ साग अन्तर्गत आफ्नो तेस्रो खेलमा पराजित भएको छ । शुक्रबार भएको खेलमा नेपाल श्रीलंकाको महिला क्रिकेट टोलीसँग ४१ रनले पराजित भएको हो । पोखरा रंगशालमा भएको खेलमा श्रीलंकाले दिएको ११८ रनको लक्ष्य नेपाले निर्धारित २० ओभरमा ९ विकेट गुमाउँदै मात्र ७७ रन बनाउँन सक्यो ।
नेपालका लागि रुविना क्षेत्रीले सर्वाधिक १९ रनको योगदान गरिन् । कविता कुवँरले नट आउट १३ रन बनाउँदा कविता भण्डारी १२ र अप्सरी बेगमले ११ रनको योगदान गर्दा नेपालका लागि अन्य खेलाडीले दोहोरो रन जोड्न सकेनन् । यसअघि टस जितेर पहिले ब्याटिङ गरेको श्रीलंकाले निर्धारित २० ओभरमा ७ विकेट गुमाउँदै ११८ रन बनाएको थियो । श्रीलंकाका लागि लाहिनी अप्सराले सर्वाधिक ३७ रन बनाउँदा जनादी अनालील ३५ र सत्या सन्दीपनीले २२ रन जोडिन् ।
बलिङतर्फ सरस्वती कुमारी र सोनु खड्काले दुई–दुई विकेट लिइन् ।
