पोखरा । मंसिर १४ को उपनिर्वाचनमा बाग्लुङ २ ‘ख’ बाट निर्वाचित गण्डकी प्रदेशसभा सदस्य खिमविक्रम शाहीले पद तथा गोपनीयताको शपथ लिएका छन् ।
बिहीबार प्रदेशसभा सचिवालयमा उनलाई प्रदेश सभामुख नेत्रनाथ अधिकारीले प्रदेशसभा सदस्य निर्वाचन ऐन, २०७४ को दफा ७५ बमोजिम शपथ दिलाएका हुन् । शाही राष्ट्रिय जनमोर्चाबाट निर्वाचित भएका हुन् । उनलाई बाग्लुङमा नेकपाले समर्थन गरेको थियो ।
उक्त क्षेत्रबाट यसअघि निर्वाचित टेकबहादुर घर्तीमगरको २०७५ मंसिर २७ गते जण्डिसका कारण उपचाररत रहेकै अवस्थामा निधन भएको थियो । त्यसपछि रिक्त स्थानको लागि मंसिर १४ गते उपचुनाव भएको हो ।
उपचुनावमा राजमोका शाहीले ११ हजार दुई सय ३५ ल्याएर विजयी भएका हुन् । उनले कांग्रेसका जीत शेरचनलाई दुई हजार ९७ मतले पराजित गरे । शेरचनले नौ हजार १३८ मत ल्याएका थिए ।
शपथग्रहण पश्चात उनले आफ्ना क्षेत्रको जनताको समस्या संसदमा उठान गर्ने र नीति निर्माणमा भूमिका खेल्ने बताए ।
“हाम्रो क्षेत्रको समस्या, खानेपानी, विद्युत, पर्यटन, कृषि क्षेत्रको समस्याहरु छन्, यी क्षेत्रमा जनता प्रत्यक्ष रुपमा प्रभावित छन्, संसदबाट मैले यस विषयमा आवाज उठान गर्नेछु । अर्को कुरा, नीति निर्माणमा पनि मेरो भूमिका रहने नै भयो, गणतन्त्र संस्थागत गर्ने, राष्ट्रियता बचाउने विषयमा मेरो भूमिका हुनेछ,” उनले भने ।
शाहीलाई शपथपश्चात गण्डकी प्रदेशका मुख्यमन्त्री, उपसभामुख, प्रदेशसभा सदस्यहरुले बधाई दिएका थिए ।
