पोखरा । नेपाल भ्रमणमा रहेका बंगलादेशका राष्ट्रपति मोहम्मद अब्दुल हमिद बिहीबार पोखरा आउनेछन् । बिहीबार दिनको १२ बजे उनी पोखरा आइपुग्ने कार्यक्रम छ ।

राष्ट्रपति हमिदको बसाइ अवधिभर पोखराको सुरक्षा व्यवस्था कडा पारिने भएको छ । प्रदेश मन्त्रिपरिषदले निर्णय नै गरेर हमिदको सुरक्षाको लागि प्रदेश सुरक्षा व्यवस्था समिति र प्रमुख जिल्ला अधिकारी नेतृत्वको जिल्ला सुरक्षा व्यवस्था समितिलाई निर्देशन दिएको छ ।

उनलाई प्रदेशका कार्यवाहक मुख्यमन्त्री किरण गुरुङले पोखरा विमानस्थलमा स्वागत गर्नेछन् । गण्डकी प्रदेशका मुख्यमन्त्री पृथ्वीसुब्बा गुरुङ भने दुई साता अघिदेखि अमेरिका भ्रमणमा छन् ।

पोखरा विमानस्थल अगाडि स्वागतद्धार निर्माण गरिएको हो । ठाउँठाउँमा नेपाल र बंगलादेशको झण्डा पनि राखिएको छ । हमिदलाई पोखरा महानगरको तर्फबाट विभिन्न जातीय, सांस्कृतिक, कला, प्रदर्शनी, पञ्चेबाजा बजाएर स्वागत गरिनेछ ।

स्वागतलगत्तै उनले पोखरामा फेवाताल शयर गर्नेछन् भने फिस्टेल लजमा लञ्च ब्रेक हुनेछ । विमानस्थलबाट सिधै फेवाताल प्रस्थान गर्ने र ४० मिनेट फेवातालमा बोटिङ गर्ने कार्यसूची रहेको छ ।

त्यसपछि फिस्टेल लजमा लञ्च गर्ने र हेलिकप्टरमा नै रुपाकोट रिसोर्ट जानेछन् । रुपाकोटमा हमिदलाई प्रदेशका आन्तरिक मामिला तथा कानुनमन्त्री हरिबहादुर चुमानले स्वागत गर्नेछन् । रुपा गाउँपालिकाले त्यहाँ स्वागत गेट बनाउनेदेखि विभिन्न कला, सांस्कृतिक नाच झाँकीहरु प्रदर्शन गर्नेछ ।

रुपाकोटमा उनले एक घण्टा बिताउने कार्यक्रम छ । त्यसपछि उनी भोलि नै काठमाडौं फर्कनेछन् ।

हमिदको भ्रमण तथा लञ्चको व्यवस्थापन भने प्रदेश सरकारले गर्ने भएको छ । “राष्ट्रपतिको पोखरा भ्रमणको बेला हुने सबै खर्च प्रदेश सरकारले व्योहोर्नेछ,” सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले भने ।

बंगलादेशी राष्ट्रपतिको भ्रमणबाट पोखराको पर्यटन प्रवद्र्धन हुने र सरकारले लिएको लक्ष्यमा सघाउ पुग्ने अपेक्षा प्रदेश सरकारले लिएको छ । गण्डकीमा अहिले आन्तरिक पर्यटन वर्ष २०१९ चलिरहेको छ । २०२२ सम्ममा २० लाख पर्यटक भित्र्याउने लक्ष्य सरकारले लिएको छ ।

“पर्यटन प्रवद्र्धनसँगै आर्थिक समृद्धिमा पनि सहयोग पुग्नेछ,” प्रवक्ता बस्नेतले बताए ।