काठमाडौं । अष्टे«लियामा आगामी वर्ष हुने टि–ट्वान्टी विश्वकपका लागि नामिबिया पहिलो पटक छनोट भएको छ । युनाइटेड अरब इमिरेट्स (युएई)मा छनोटको दोस्रो प्ले अफमा ओमानलाई पराजित गर्दै नामिबिया पहिलो पटक विश्वकपमा छनोट भएको हो ।
गएराती सम्पन्न खेलमा नामिबियाले ओमानमाथि ५४ रनको जित निकाल्दा जेजे स्मिथले उत्कृष्ट प्रदर्शन गरे । १ सय ६२ रनको लक्ष्य पछ्याउँदै जवाफी ब्याटिङ थालेको ओमान १९ दशमलव १ ओभरमा अल आउट भएपछि नामिबिया पहिलो पटक विश्वकपमा छनोट हुन सफल भयो ।
ओमानका लागि खवर अलीले सर्वाधिक ४१ रन बनाए । अकीव इलियासले १८ रन बनाउँदा अमिर कलिम १३ र सुरज कुमारले ६ रन बनाउनु बाहेक अन्यको प्रदर्शन सम्झनलायक रहेन । ओमानका खेलाडीलाई सस्तैमा समेट्न नामिबियाका गेरहार्ड इरास्मस र बर्नार्ड शोल्ट्जले ३–३ विकेट लिए । जेजे स्मिथको नाममा २ विकेट रह्यो ।
त्यसअघि पहिलम ब्याटिङ गरेको नामिबियाले २० ओभरमा ७ विकेट गुमाउँदै १ सय ६१ रन बनाएको थियो । नामिबियाका लागि जेजेले ५९ रन बनाउँदा क्रेग विलियम्सले ४५ तथा निको डविनले २१ रन बनाएका थिए । ओमानका बिलाल खानले ४ विकेट लिएका लिएका थिए ।
समूह बी मा दोस्रो स्थानमा रहँदै प्ले अफ खेलेको ओमानले आज अन्तिम मौका खेलमा हङकङसँग खेल्नेछ । तेस्रो स्थानमा रहँदै प्लेअफ खेलेको नामिबियाले भने ऐतिहासिक रुपमा विश्वकपमा प्रवेश पाएको छ ।
अर्को प्लेअफमा आज यूएई र स्कटल्यान्डबीच प्लेअफमा प्रतिस्पर्धा हुँदैछ । विजेता टोली सोझै विश्वकपमा पुग्ने छ । पहिलो प्ले अफमा नेदरल्यान्ड्स हार ब्यहोरेको युएइले आज मौका पाएको हो । स्कटल्यान्ड भने समूह ए को चौथो स्थानमा रहँदै प्ले अफ पुगेको टोली हो ।
समूह ए बाट शीर्ष स्थानमा रहँदै पप्पुवा न्युगिनी विश्वकपमा छनोट हुँदा समूह बी बाट आयरल्यान्ड छनोट भएको छ । नेदरल्यान्ड पनि विश्वकप छनोट भइसकेको छ ।
