वाशिङटन । इबोला भाइरसका कारण हुने रोगका लागि बनाइएका औषधीहरुको परीक्षणमा सफलता मिल्दै गएकोले अब सो रोग उपचार हुन सक्ने रोगमा परिणत हुन लागेको वैज्ञानिकहरुले बताएका छन् । उनीहरुका अनुसार यो रोगका बिरामीलाई परीक्षण गर्दा ती औषधीहरुमा ९० प्रतिशत सफलता प्राप्त भएको छ ।
उनीहरुका अनुसार डेमोक्रेटिक रिपब्लिक अफ कंगोमा सोे रोगका बिरामीका लागि चार वटा औषधीको परीक्षण गरिएको थियो । ती मध्येका दुई आरइजीएन –इबी ३ र एमएबी ११४ नामका औषधी सो रोगको उपचारका लागि प्रभावकारी देखिएका छन् । अमेरिकाको नेशनल इन्स्टिच्युट अफ एलर्जी एण्ड इन्फेक्सस डिजिज(एनआइएआइडी)ले सो परीक्षणको सहप्रायोजन गरेको हो । सो कम्पनीले इबोला विरुद्धको लडाईमा यो राम्रो खबर भएको जनाएको छ ।
सो रोगबाट गएका वर्षमा कंगोमा १,८०० मानिसको मृत्यु भएको थियो । कम प्रभावकारी भएका कारण जेडमाप र रेमडेसीभीर नामका दुई औषधीको प्रयोग भने बन्द गरिएको जनाइएको छ । अहिले पूर्वी कंगोमा यो रोगको प्रकोप फैलिएको छ भने यसअघि गुयना, लाइबेरिया,सियरालियोन लगायतका देशमा गरेर अहिले सम्म ११ हजार ३१० जना मानिसको मृत्यु भइसकेको छ ।
यो सरुवा रोग सबैभन्दा पहिला सुडान र कंगोमा सन् १९७६मा देखा परेको हो । यो रोग लाग्दा ज्वरो आउने, घाँटी दुख्ने, मांशपेशीमा पीडा हुने, वान्ता तथा पखाला लाग्ने र केही दिनमा नै मानिसको मृत्यु हुने लक्षण देखिँदै आएका थिए । (बीबीसी तथा एजेन्सीको सहयोगमा)
