काठमाडौं । आफूलाई स्कुल (विद्यालय) र घरमा कसैले माया नगरेको भन्दै ललितपुरमा एक ११ वर्षीय बालकले ‘सुसाइट’ नोट लेखेर आत्महत्या गरेका छन् । ललितपुर बागमती गाउँपालिका–२ माल्टास्थित कालिदेवी माध्यमिक विद्यालयको कक्षा ५ मा अध्ययनरत ११ वर्षिय समिर लुङ्वाले घरमै झुण्डिएर आत्महत्या गरेका हुन् ।
महानगरीय प्रहरी परिसर ललितपुरका वरिष्ठ प्रहरी उपरीक्षक (एसएसपी) रविन्द्र धानुकले घटनाबारे अनुसन्धान भइरहेको बताए । ११ वर्षीय बालकले ‘सुसाइड’ नोट लेखेर आत्महत्या गरेको यो नेपालकै पहिलो घटना भएको बताइएको छ ।
प्रहरीका अनुसार उनले सुसाइड नोटमा लेखेका छन्, ‘‘मेरो नाम समिर लुङवा हो । म कक्षा ५ मा पढ्छु । मेरो रोल नम्बर ५ हो । आज म केही कुरा भन्न चाहन्छु । म धेरै दुःखमा छु, मलाई कसैले माया गर्दैन । कक्षामा केटाहरुलाई पिट्ने र केटीहरुलाई नपिट्ने र घरमा मलाई दाइ भाउजुले हेला गर्ने, कोही सर मिस त नहुने म तिनिहरुको नाम लेख्दै छु । सरले म बिरामी हुँदा मलाई बिरामी भाको छैन भन्ने । म यति भन्दै बिदा माग्छु । म एघार वर्ष भएँ म जन्मेको महिना कार्तिक १४ गते हो । म यो संसार छोडेर जाँदैछु ।’’