काठमाडौं । विदेशी विज्ञापन बज्ने सबैजसो विदेशी च्यानल अस्थायी रुपमा बन्द भएका छन् । केवल टेलिभिजन व्यवसायीले सरकारले ल्याएको ‘क्लिन फिड’ सम्बन्धी व्यवस्थाको विरोध गर्दै विज्ञापन बज्ने च्यानल एक दिनका लागि बन्द गराएका हुन् ।
सोमबार पत्रकार सम्मेलन गरि व्यवसायीहरुको छाता संगठनले सोमबार अपरान्ह ३ बजेदेखि मंगलबार अपरान्ह ३ बजेसम्म सबै च्यानलहरु बन्द रहने जानकारी दिए । उनीहरुले सरकारले चाहेअनुसारको क्लिन फिडको मुहार अनुभव गराउन विदेशी विज्ञापन भएका च्यानल बन्द गरेको बताए ।
व्यवसायीहरुले यो व्यवस्था लागू हुँदा आउने परिस्थितिबारे आम उपभोक्ता र सरोकारवालालाई जानकारी दिन २४ घण्टा प्रशारण बन्द गर्नु परेको बताए ।
नेपालमा प्रसारण हुने ८५ प्रतिशत च्यानलहरु विदेशी छन् । इन्डियन ब्रोडकास्टर फोरमले भने नेपाललाई मात्रै क्लिन फिड अर्थात विज्ञापनरहीत च्यानल दिन व्यवहारिक र व्यवसायिक रुपमा असमर्थ हुने जनाएको छ ।
प्रस्तावित विज्ञापन ऐन, २०७६ लागू भए डिजिटल टिभी व्यवसायको अर्बौं रुपैयाँको लगानी डुब्ने व्यवसायीले बताएका छन् । इन्टरनेट तथा डिजिटल टिभी समन्वय समितिका अध्यक्ष दिनेश सुवेदीले संविधानले दिएको सूचना तथा मनोरञ्जनको हकबाट पनि नेपाली जनता वञ्चित हुने भन्दै सरकारलाई गम्भीर बन्न आग्रह गरे ।
नेपालमा संञ्चालित डीटीएच, आर्यपीटीभी र ओटीटीका कम्पनीहरुले नेपाली च्यानलहरु मात्रै देखाएर ग्राहकहरुसंँ मासिक शुल्क उठाउन नसक्ने हुँदा ती कम्पनी बन्द हुने र त्यसले अर्बौंको लगानी डुब्नुको साथै हजारौंको रोजगारी गुम्ने अवस्था सिर्जना हुने जनाएको छ । नेपालमा प्रशारित विदेशी च्यानलहरु विज्ञापनरहित (क्लिन फिड) अनिवार्य हुने प्रावधान सहितको ‘विज्ञापन नियमन गर्ने सम्बन्धमा व्यवस्था गर्न बनेको विधेयक’ संसदमा छलफलको क्रममा छ ।