काठमान्डौं । इन्टरनेट सेवाप्रदायक संघ नेपाल (आइस्पान)ले इन्टरनेट सेवाको निरन्तरता र गुणस्तरको सुनिश्चितता आफ्नो हातबाट गुमेको बताएको छ । सरकारले जबर्जस्ती गरेर तिर्न नपर्ने पैसा तिर्न दबाब दिएका कारण यस्तो स्थिति बनेको आइस्पानको भनाइ छ ।
बिहीबार काठमाडौंमा आयोजित पत्रकार सम्मेलनमा आइस्पानका अध्यक्ष सुधीर पराजुलीले आफूहरूले कुनै पनि पैसा तिर्न बाँकी नरहेको दाबी गरे । उनले भने, “संसद् र अदालतबाट समेत तिर्न नपर्ने भन्ने कुरामा सरकारले तिर कि तिर भनेर दबाब दिइरहेको छ ।”
बक्यौता नतिरेको भन्दै सरकारले विदेशी मुद्रा भुक्तानीका लागि सिफारिस नगरेको उनले बताए । भारतबाट आयात गरेको ब्यान्डविथको पैसा नौ महिनासम्म तिर्न नपाएका कारण इन्टरनेट सेवाको सुनिश्चितता गर्न सक्ने अवस्था नरहेको उनले बताए ।
“एयरटेल, टाटालगायतलाई नौ महिनासम्म पैसा नतिर्दा सम्झौता नै रद्द हुने अवस्थामा पुगेको छ,” आइस्पनका अध्यक्ष पराजुलीले भने, “नेपालभित्र दिइरहेको इन्टरनेट सेवाको निरन्तरतता र गुणस्तर हाम्रो हातमा रहेन ।”
