काठमाडौं । तेस्रो संस्करणको प्रधानमन्त्री कप एकदिवसीय राष्ट्रिय क्रिकेट प्रतियोगिताका लागि ३ वटा प्रदेशले टोली घोषणा गरेका छन् । प्रदेश नम्बर ३ ले राष्ट्रिय टोलीका कप्तानसमेत रहेका पारस खड्काको कप्तानीमा टोली घोषणा गर्दा प्रदेश नम्बर २ ले मेहबुब आलमको नेतृत्वमा तथा प्रदेश नम्बर १ ले पुष्प थापाको कप्तानीमा टोली घोषणा गरेको छ ।
प्रतियोगिता सुरु हुन २ दिनअघि ३ टोलीले १४ सदस्यीय टोलीको टुंगो लगाएका छन् । पारस कप्तान रहेको प्रदेश ३ टोलीमा राष्ट्रिय टोलीका उपकप्तान समेत रहेका ज्ञानेन्द्र मल्ल उपकप्तानकै जिम्मेवारी दिइएको छ । मल्लसँगै टोलीमा युवा खेलाडी प्रतिश जिसी, रित गौतम, सोनु तामाङ, जितेन्द्र सिंह ठकुरी, इशान पान्डे, अभिषेक बस्नेत, सूर्य तामाङ, सोनु देवकोटा, नन्दन यादव, गौतम केसी, आदिल खान र रबिन जोशी छन् ।
मेहबुब आलमको कप्तानीमा रहेको प्रदेश २ मा उपकप्तान हासिम अन्सारी छन् । सुधीर चौधरीले टोलीमा स्थान बनाउँदा रबि शाह, कन्चनजंग कार्की, सुरज पटेल, हरि शंकर शाह, विशाल शुसलिङ, सांसद शेख, राहुल प्रताप सिंह, विवेक यादव, राशिद खान, कुमार थापा र दिब्यांशु मलिक छन् । यस्तै,पुष्प थापाको कप्तानीमा रहेको प्रदेश १ को टोलीमा ‘हेलिकोप्टर सट’ले परिचित सिद्धान्त लोहनी पनि छन् । कमल खत्री ,रवि राय, मुकुन्द यादव, मिनाश थापा, श्रवण यादव, राजन मगर, दिपेश कँडेल, फिर्दोष अन्सारी, सरोज बस्नेत, अंकित सुवेदी, सन्नी पुन, अभ्यास तिम्सिना छन् ।
प्रधानमन्त्री कप एकदिवसीय क्रिकेट प्रतियोगिता शुक्रबारबाट सुरु हुँदैछ । मुलपानी क्रिकेट मैदान उद्घाटन र बाँकी खेलहरु कीर्तिपुरस्थित त्रिवि क्रिकेट मैदानमा हुनेछ । प्रतियोगितामा सहभागी हुने अन्य ४ प्रदेशले टोली घोषणा गर्न बाँकी छ । विभागीय टोली भने नियमित अभ्यासमा छन् । १० टोलीलाई २ समूहमा विभाजन गरिएको छ । समूह ए मा विभागीय क्लब एपीएफ, प्रदेश ५, प्रदेश ३, सुदूरपश्चिम र गण्डकी रहेका छन् । समुह बी मा विभागीय क्लब त्रिभुवन आर्मी, नेपाल पुलिस, प्रदेश २, प्रदेश १ र कर्णाली प्रदेश छ ।