काठमाडौं । नेपाली राष्ट्रिय खेलाडी साबित्रा भण्डारीले चार गोल गरेको सोमबार तामिलनाडु क्लब सेतु भारतीय महिला लिग फुटबलको फाइनलमा पुगेको छ ।
साबित्राले चार तथा ग्रेसले ह्याट्रिक गरेपछि सेतु सेन्ट्रल एसएसबी वुमन्सविरुद्ध ८-१ गोलअन्तरको जित निकाल्दै उपाधि नजिक पुगेको हो । सेतुले अब उपाधिका लागि मणिपुर पुलिस स्पोर्टस क्लबसँग प्रतिस्पर्धा गर्नेछ ।
लुधियानास्थित गुरु नानक स्टेडियममा एकलौटी बनेको खेलमा नेपालकी साबित्रा चम्कीन् । पहिलो हाफ सकिन चार मिनेट बाँकी रहँदा पहिलो गोल गरेकी साबित्राले ५९ औं मिनेटमा दोस्रो तथा ६५ औं मिनेटमा ह्याट्रिक पुरा गरीन् । खेल सकिन केही समय बाँकी रहँदा सेतुले टोलीका लागि आठौं तथा ब्यक्तिगत चौथो गोल गरिन् ।
आजको ४ गोलसंगै साबित्राको जारी भारतीय महिला लिगमा गोलसङख्या १३ पुगेको छ । उनी सर्वाधिक गोल गर्ने खेलाडीको दोस्रो नम्बरमा छन् । मणिपुर पुलिस स्पोर्टसकी बालादेबी २६ गोलसहित शीर्ष स्थानमा छन् ।
सेतुको जितमा ग्रेसले पनि ह्याटिक गरिन् । १३ औं मिनेटमा पहिलो गोल गरेकी ग्रेसले पहिलो हाफको इन्जुरी समयमा दोस्रो तथा ५२ औं ह्याट्रिक गरेकी हुन् । सेतुका लागि रतनवालादेबी १ गोल गरेकी थिइन् । एसएसबीको टोलीले एक गोल फर्काए पनि हार टार्न सकेन् । फाइनल भिडन्त बुधबार हुनेछ ।
मणिपुर पुलिस स्पोर्टसले सोमबार भएको पहिलो सेमिफाइनलमा गोकुलम केरलालाई ४-२ को गोलअन्तरले हराउँदै फाइनलमा स्थान बनाएको छ ।
