काठमाडौं । महानगरीय प्रहरी अपराध महाशाखाले हतियार देखाएर लुटपाट गर्ने तीन जनालाई पक्राउ गरेको छ । चैत २६ गते दिउँसो ११:३० बजे काठमाडौं महानगरपालिका-२९ रानीबारीमा लोलेन्द्र शेरचनको घरबाट पाँच लाख साठी हजार बराबरको धनमाल लुट्ने तीन जनालाई शुक्रबार पक्राउ गरेको जनाइएको छ ।
लालेन्द्र शेरचन, उनकी श्रीमती मानुदेवी शेरचन र घरको रेखदेख गर्ने मिठु थकालीलाई धारिलो हतियार देखाएर मुखमा टेप लगाइ हातखुट्टा बाँधेर दराज फोडेर पाँच लाख साठी हजार बराबरको धनमाल लुटेको भन्दै दिएको उजुरीहरुको आधारमा उनीहरुलाई पक्राउ गरिएको हो ।
पक्राउ पर्नेमा काठमाडौंको चन्द्रगिरी नगरपालिका-८ का ३८ वर्षीय नवराज तामाङ, सोही ठाउँका ३६ वर्षीय विक्रम श्रेष्ठ, नुवाकोट बेलकोटगढी-५ कथुरानीका २८ वर्षीय दिपेश भन्ने सन्तबहादुर तामाङ छन् । लुटपाटमा संल्ग्न तीन जना भने फरार छन् ।
लुटपाटमा प्रयोग गरिएका ट्याक्सी र स्पोर्टेज जिप र लुटिएको सुनका गहनासमेत प्रहरीले बरामद गरेको छ ।