काठमाडौं ।  आर्थिक वर्ष २०७३–०७४ को तुलनामा ०७४–०७५ मा अपराधमा २५ प्रतिशतले वृद्धि भएको एक सरकारी तथ्यांकले देखाएको छ । महालेखा परीक्षकको ५६ औं प्रतिवेदनअनुसार २५ प्रतिशतले अपराधमा वृद्धि भएको पाइएको हो । 

तथ्यांक अनुसार गतवर्ष संगठित तथा आर्थिक अपराध २९.५८ प्रतिशत, सामाजिक अपराध ४०.८९ प्रतिशत, महिला तथा बालबालिकासम्बन्धी अपराध ३३.४५ प्रतिशतले बढेका छन् । दर्ता भएका मुद्दाहरुको फछ्र्यौट दर ३५ प्रतिशत छ । 

महालेखाले पछिल्ला चार वर्षको अपराधको तुलनासमेत गरेको छ । आर्थिक वर्ष ०७१–०७२ मा ज्यानसम्बन्धी चार हजार छ सय ८७ अपराधका घटना हुँदा ०७२–०७३ मा त्यो संख्या बढेर पाँच हजार ३ सय ६७ पुगेको छ । ०७३–०७४ मा पाँच हजार नौ सय आठ ज्यानसम्बन्धी अपराधका मुद्दा दायर हुँदा ०७४–०७५ मा छ हजार चार सय पाँच घटना भए । यस्तै आत्महत्याको दर पनि बढ्दो क्रममा पाइएको छ ।

०७१–०७२ देखि ०७४–०७५ सम्म पुग्दा क्रमशः चार हजार पाँच सय चार, चार हजार छ सय ८०, पाँच हजार एक सय २४ र पाँच हजार तीन सय १७ जनाले आत्महत्या गरेका छन् । 
पछिल्ला तथ्यांक केलाउने हो भने आत्महत्या गर्ने संख्या बढ्दो देखिन्छ । आर्थिक वर्ष ०७१–०७२ मा तीन हजार दुई आर्थिक अपराधका मुद्दा दायर हुँदा ०७२–०७३ मा तीन हजार सात सय २३, ०७३–०७४ मा तीन हजार पाँच सय ९३ र ०७४–०७५ मा चार हजार छ सय ४६ आर्थिक र संगठित अपराधका घटना भएका छन् । 

पछिल्ला चार वर्षमा चोरी पनि बढ्दो क्रममा देखिएको छ । ०७१–०७२ देखि ०७४–०७५ सम्म हेर्दा क्रमशः एक हजार एक सय २८, एक हजार पाँच सय ७८, एक हजार ६ सय २७ र एक हजार छ सय २८ चोरीसम्बन्धी अपराध भएका छन् । 

यही अवधीमा महिला तथा बालबालिकासम्बन्धी अपराधको ग्राफ पनि बढेको छ । ०७१–०७२ मा महिला तथा बालबालिका सम्बन्धी दुई हजार १६ मुद्दा दर्ता भएका थिए भने ०७२–०७३ मा दई हजार दुई सय ९५, ०७३–०७४ मा दुई हजार चार सय ३९ र ०७४–०७५ मा तीन हजार दुई सय ५५ मुद्दा दर्ता भएका छन् । सबैभन्दा डरलाग्दो रुपमा सामाजिक अपराध देखिएको छ । ०७१–०७२ देखि ०७४–०७५ सम्म आइपुग्दा क्रमशः सामाजिक अपराधको संख्या दश हजार एक सय ३३, आठ हजार छ सय ८९, दश हजार दुई सय ५६ र चौध हजार चार सय ५० मुद्दा दर्ता भएको देखिन्छ ।

सवारी दुर्घटना पनि बढेको पाइएको छ । पछिल्ला चार वर्ष (०७१–०७४) मा क्रकशः एक हजार चार सय ४१, एक हजार आठ सय २०, दुई हजार एक सय ५० र तीन हजार दुई सय ५५ सवारीसम्बन्धी अपराध भएको पाइएको छ ।

समग्रमा ०७१–०७२ मा २७ हजार तीन सय ८६ विभिन्न प्रकृतीका अपराधका मुद्दा दायर हुँदा ०७२–०७३ मा २८ हजार पाँच सय ६३, ०७३–०७४ मा ३१ हजार चार सय ६२ र ०७४–०७५ मा ३९ हजार तीन सय १५ विभिन्न प्रकृतीका अपराधका घटना र मुद्दा दायर भएका छन् । 

पछिल्लो तीन वर्षमा अपराधको प्रतिशत ४.३०, १०.८० र २४.९६ प्रतिशतले वृद्धि भएको महालेखाको तथ्यांकमा उल्लेख छ । 

नेपाल प्रहरी प्रवक्ता वरिष्ठ प्रहरी उपरीक्षक (एसएसपी) उत्तमराज सुवेदीले भने, ‘‘आत्महत्या, दुर्घटना र प्राकृतिक विपद्लाई कसरी अपराध मान्ने ?’’ सुवेदीले अपराध न्युनीकरणमा प्रहरी सफल हुँदै गएको दाबी गरे । उनले थपे, ‘‘प्रहरी सक्रियता बढेकाले अपराधका घटना उजागर भएका हुन् । अपराध नियन्त्रण र न्यूनीकरणमा हामी सफल भएका छौं ।’’