काठमाडौं । हामीकहाँ लौकिक कहावत् छ– ‘आफू नमरी स्वर्ग देख्न पाइँदैन ।’ यो मिथलाई विस्थापित गर्छ– नेपालको खप्तड क्षेत्रले । खप्तड क्षेत्र नै यस्तो वैशिष्ट्य भूमि हो जसले काल्पनिक स्वर्गको तृष्णालाई मेटाइदिन्छ ।
“सेती अञ्चलको भूस्वर्ग खप्तड पुगिएन भने जीवनको सार्थकता रहँदैन,” खप्तडको सौन्दर्यछटा र चित्ताकर्षक पर्यावरणलाई यसरी चित्रित गर्छन्, फोटो पत्रकार आरके अदीप्त गिरि ।
बझाङ, बाजुरा डोटी र अछाम जिल्लाको संगम र आदिम धाम खप्तड क्षेत्र कुचीकारले क्यानभासमा उतारेको सुन्दर दृष्यछटाजस्तो छ ।
२२५ वर्ग किलोमिटरमा फैलिएको खप्तडको पाटनमा वर्षेनी जेठमा ‘क्याराभान’ चल्छ । आरके थप्छन्, “खप्तड क्षेत्रमा दशहरा गंगामा विशाल घोडादौड प्रतिस्पर्धा हुन्छ, यसले महाभारत धर्मग्रन्थमा वर्णित दृष्यलाई छायामा पार्छ ।”
काठमाडौंले निकै धामा गरेर देख्न पाउने दृष्यलाई आरकेले क्यामेरामा सादृष्य उतारेका छन् । र, शुक्रबारदेखि नेपाल कला परिषद्को सिरानको तलामा जारी ‘नेपाल सुन्दर छ’ तस्बिर प्रदर्शनीको विशेष आकर्षण बनेको छ ।
गैर नाफामूलक संस्था ‘देशलाई हाम्रो खाँचो छ’ ले आयोजना गरेको प्रर्दशनीमा १०१ तस्बिर छन् ।
० ० ०
मैथिली सभ्यता तराई–मधेसका मानक सभ्यता हो । काठमाडौंका प्रदर्शनीमा विरलै ठाउँ पाउने गर्छ । यस्तो लाग्छ–काठमाडौं र मिथिला सभ्यताको बीचमा नजानिँदो दूरी छ । तर, यो दूरीलाई धेरै हदसम्म मेटाउने काम गरेको छ– ‘नेपाल सुन्दर छ’ तस्बिर प्रदर्शनीले ।
सेतुको काम गरेका छन्– अजय रानाभाटले ।
मुखभागमा उभिइरहेको रामजानकी मन्दिर र अग्रभागमा छिरलिएका दृष्यहरू मैथिली सभ्यताको जिउँदो तस्बिर बन्न पुगेको छ ।
सोमबारसम्म चल्ने प्रदर्शनीमा २९ जना फोटोग्राफरका तस्बिर समाविष्ट छन् । मूलधारमा रहेर फोटोपत्रकारिता गर्नेदेखि मोफसलमा रहेर कला–साधना गर्नेहरूसम्मका तस्बिरले उत्तिकै महत्त्व पाएका छन् ।
“सरकारले घोषणा गरेको नेपाल भ्रमण वर्ष २०२० लाई सफल बनाउन हामीले तस्बिर प्रदर्शनी गरेका हौँ,” संस्थाकी कोषाध्यक्ष विनीता ओलीले जानकारी दिइन् ।
प्रदर्शनीमा संस्कृति, जीवनशैली, रहनसहन, प्रकृति, पर्यावरणलागयत विविध विधाका चित्र समावृष्ट छन् । यी सबै देशको छायाँछवि बन्न पुगेको आयोजकको दाबी छ ।
दोस्रो संस्करणको यो चित्र प्रदर्शनीले नेपाल सुन्दर भएको र पटकपटक हेरेर पनि धित नमर्ने सन्देश दिने ओलीको भनाइ छ ।
नवराज राउतले खिचेको पाटन दरबार क्षेत्र ।
अजय रानाभाटले खिचेको तिलिचो ताल ।
चेतन ओलीले यात्रा शीर्षकमा कैद गरेको तस्बिर ।
विषोका मुल्मीले खिचेको भक्तपुरको जिब्रो छेड्ने जात्रा ।
आरके अदीप्त गिरिले खिचेको बाग्लुङको सोरठ्ठी नृत्य ।
सुनीलमान स्थापितले कैद गरेको ल्याण्डस्केप ।
सुशील श्रेष्ठले कैद गरेको वन्यजन्तु ।
यज्ञलाल ज्ञवालीले कैद गरेको पाल्पाको रानीमहल ।
प्रवीण रानाभाटले कैद गरेको नुवाकोट तारुकाको, गोरुजुधाइ ।
अजय महर्जनले खिचेको संस्कृति ।
अजय महर्जनले खिचेको संस्कृति ।
सुशील श्रेष्ठले खिचेको चिडियाघरको रेड पान्डा ।
विषोका मुल्मीले खिचेको तस्बिर ।