धनगढी । रुपन्देही च्यालेन्जर्समाथि १ रनको रोमान्चक जित निकाल्दै महेन्द्रनगर युनाइटेड धनगढी प्रिमिएर लिग क्रिकेटको क्वालिफायर्समा पुगेको छ । महेन्द्रनगरले अब फाइनल प्रवेशका लागि पहिलो क्वालिफायर्समा पराजित काठमाडौं गोल्डेन्ससँग प्रतिस्पर्धा गर्नेछ ।
फाप्ला क्रिकेट मैदानमा १ सय १६ रनको लक्ष्य पछ्याएको रुपन्देही निर्धारित ओभरमा ९ विकेटको क्षतिमा १ सय १४ रनमा समेटिएपछि महेन्द्रनगर क्वालिफायर्समा स्थान बनाउन सफल भयो । जित नजिक पुगेको रुपन्देही प्रदिप ऐरी २८ रनमा आउट भएपछि दबाबमा परेको थियो । त्यसपछि आएका बिक्रम सोब क्याचआउट भए । अन्तिम बलमा ३ रन आवश्यक रहेको रुपन्देहीले १ रन मात्र जोड्न सक्यो ।
रुपन्देहीका लागि ओपनर बाबर हायतले २८ रन बनाएका थिए । अभिनास बोहराको बलमा बोल्ड हुनअघि बाबरले २९ बलमा २ चौका र १ छक्का प्रहार गरे । प्रदिप ऐरीले पनि २८ रन बनाए । २० बल सामना गरेका उनले ४ चौका प्रहार गरे । विनोद भण्डारीले २३ रन जोडे । उनले १ चौका र १ छक्का प्रहार गरेका थिए । सन्दीप सुनारले १४ रन बनाए ।  सुमित महर्जन १० रनमा क्याच भए । पुनित मेहराले ६ तथा भिम सार्कीले खाता खोल्न सकेनन् ।
यसअघि पहिला ब्याटिङ गरेको महेन्द्रनगरले निर्धारित २० ओभरमा ८ विकेटको क्षतिमा १ सय १५ रन बनाएको थियो । महेन्द्रनगरका लागि कप्तान शरद भेषावाकरले २९ रन बनाएका थिए । महेन्द्रनगरको इनिङसलाई उकासेका शरदले ३८ बलमा २ चौका प्रहार गरे । अमरसिह रौटेलाले १९ रन जोड्दा विदेशी खेलाडी आन्नदले २० तथा मोहम्मद नाभिदले १८ रन बनाए ।
आरीफ शेखले १२ तथा अभिनास बोहराले ११ रन जोडे  । रोहित पौडेल २ रनमा पेभेलियन फर्किँदा दिलिप नाथ र सिदान्त लोहनी र साहब आलमले खाता नै खोल्न सकेनन् ।
रुपन्देही च्यालेन्जर्सका ललितसिह भण्डारीले ४ विकेट लिए । पुनित मेहराले ३ तथा वसन्त रेग्मीले २ विकेट लिए । विराटनगर पराजित भएपछि लिगको चौथो स्थानमा रहँदै महेन्द्रनगर एलिमिनेटरमा पुगेको हो । रुपन्देही तेस्रो स्थानमा रहेको टोली हो ।