ताइवान । ताइवानका राष्ट्रपति साइ इङ वेनले चीन सैनिक हिसाबले आक्रामक रुपमा अघि बढेकोले सर्तक रहन विश्व समुदायलाई आग्रह गरेकी छन् । उनले सीएनएनलाई दिएको एक अन्तर्वार्तामा चीन राष्ट्रपति सी जिनपिङको नेतृत्वमा विदेश नीतिमा आक्रामक बन्दै गएको बताएकी छन् ।
‘‘अहिले ताइवान छ । अब कुन देश ?यदि उसले चीनको इच्छा पूरा गर्न नचाहेमा यो क्षेत्रको कुनैपनि राष्ट्र पर्न सक्छ । उनीहरुले पनि त्यसैगरी सैनिक चुनौति सामना गर्नुपर्ने हुन सक्छ’’ ताइवानका राष्ट्रपतिले भनेकी छन् ।
सन् १९४९मा चीनको गृहयुद्धपछि ताइवान टुक्रिएको हो । चीनले त्यसलाई एकीकृत गर्ने पहल गरिरहेको भएपनि यो सम्भव हुन सकेको छैन । २३ मिलियन मानिस रहेको ताइवान लोकतान्त्रिक परिपाटीमा चल्दै आएको छ ।
आफूहरुको चुनौति ताइवानको स्वतन्त्र अस्तित्व, सुरक्षा,वैभवता र प्रजातन्त्रलाई कायम राख्ने नै रहेको र यो ताइवानको सबैभन्दा ठूलो मुद्धा भएको उनले बताएकी छन् ।
(सीएनएन)