काठमाडौं । दिदीबहिनी कप राष्ट्रिय महिला भलिबल प्रतियोगिताको उपाधि विभागिय क्लब एपिएफले जितेको छ । होङगान्जी न्यु डायमण्ड एकेडेमीमाथि ३–१ को सेटमा जित निकाल्दै एपिएफले लगातार दोस्रो पटक उपाधि कब्जा गरेको हो । दिदिबहिनी भलिबलको उपाधिसँगै एपिएफको यो नवौं उपाधि हो । पर्वतको कुस्मामा आज भएको फाइनलमा एपिएफ न्यु डायमण्डमाथि २५–१८,२६–२४,२१–२५ र २५–२१ को सेटमा विजय भयो । 
विजेताले २ लाख रुपैयाँ पुरस्कार पाएको छ । उपविजेता न्यू डायमण्डले १ लाख र तेस्रो भएको नेपाल पुलिसले ५० हजार रुपैयाँ पुरस्कार पाएको छ । प्रतियोगितामा व्यक्तिगत विधातर्फ डायमण्डका खेलाडीको वर्चश्व रहँदा सर्वोकृष्ट खेलाडी घोषित एपिएफकी सरस्वती चौधरीले १० हजार पुरस्कार पाइन् । 
न्यु डायमण्डकी प्रतिभा माली उत्कृष्ट स्पाईकर, अनिसा सुनुवार उत्कृष्ट सेटर, सलिना श्रेष्ठ उत्कृष्ट डिफेन्स, कप्तान ललिता नाथ उत्कृष्ट ब्लकर र झरना श्रेष्ठ उत्कृष्ट सर्भर घोषित भइन् । उत्कृष्ट प्रशिक्षक एपीएफका ज्ञानेन्द्र विष्ट भए । विधागततर्फ उत्कृष्ट सबैले जनहि ५ हजार पुरस्कार पाए । रेडियो दिदीबहिनीको नवौं वार्षिकोत्सवका अवसरमा भलिबल प्रतियोगिता आयोजना गरीएको हो ।