काठमाडौं । समलिंगी सम्बन्धको विषयलाई मुख्य कथानक बनाएर निर्माण गरिएको चलचित्र ‘म होइन म’ले एक करोड भ्युज भएको छ । पहिचान मिडियाको युट्युव च्यानलमा एक वर्ष अगाडि अपलोड भएको चलचित्रले करोड भ्युज पाएको हो ।
नील हिरा समाजले निर्माण गरेको चलचित्र हलमा प्रदर्शन भएको छैन । ‘म होइन म’ चलचित्रले समलिंगी व्यक्तिलाई घर, परिवार र समाजले गर्ने व्यवहार र हेर्ने दृष्टिकोणलाई उतारेको छ ।
चलचित्र ‘मानव अधिकार अन्तराष्ट्रिय फिल्म महोत्सव–२०१७’ मा देखाइएको थियो । ‘म होइन म’ इलम दीक्षितले निर्देशन गरेका हुन् । ८० मिनेट लामो चलचित्रले आफ्नै परिवारले फरक यौनिकता स्वीकार नगरेसम्म समाज र राज्यले स्वीकार गर्दैन भन्ने सन्देश दिन्छ । समलैंगिक सम्बन्धलाई लिएर बनाइएको नेपालकै पहिलो चलचित्र हो ।