काठमाडौं । गृहमन्त्री रामबहादुर थापा ‘बादल’ले न्याय प्राप्तिका लागि उठाउने हरेक कदममा सरकार प्रहरीकै साथमा रहेको बताएका छन् । राष्ट्रिय प्रहरी प्रशिक्षण प्रतिष्ठान महाराजगन्जमा आयोजित १७८ औं समूह प्रहरी निरीक्षक आधारभूत तालिमको दीक्षान्त समारोहमा गृहमन्त्री थापाले यस्तो बताएका हुन् । 

गृहमन्त्री थापाले भने, ‘‘अपराध अनुसन्धानमा नेपाल प्रहरी गतिशिल, निष्पक्ष र सक्षम छ । त्यसैले न्याय प्राप्तिका लागि प्रहरीले उठाउने हरेक कदममा सरकारको साथ छ ।’’ गृहमन्त्री थापाले प्रहरी संगठनका कर्मचारीले कानुनको सर्वोच्चतामा क्रियाशिल हुनुपर्ने उल्लेख गर्दै वातावरणीय अनुकूलता प्रदान गर्न सुरक्षा कवचको रुपमा सरकार तयार रहेको बताए । उनले प्रहरी अधिकृतहरुलाई व्यतिगत जीवनमा समेत सचेत भई अगाडि बढ्न निर्देशन दिए । अविचलित निष्ठाका साथ मुलुकले अख्तियार गरेको समुन्नतितर्फको यात्रालाई सुनिश्चित राख्न शान्ति सुरक्षा कायम राख्ने गम्भीर जिम्मेवारी उच्च व्यावसायिकताका साथ पूरा गर्न गृहमन्त्री थापाले निर्देशन दिए ।

समारोहमा धन्यवाद ज्ञापन गर्दै प्रहरी महानिरीक्षक सर्वेन्द्र खनालले प्रहरी निरीक्षकको रूपमा प्रवेश गर्ने प्रहरी अधिकृत नै भविष्यमा संगठनको नेतृत्व सम्हाल्दै मुलुक र नागरिकका लागि उपयुक्त प्रहरी सेवाको प्रबन्ध गर्न जिम्मेवार हुने बताए । खनालले मुलुकको सार्वभौमसत्ता, भौगोलिक अखण्डता र स्वाधीनतालाई अक्षुण राख्दै संविधान प्रदत्त मौलिक हक र मानव अधिकारको संरक्षण एवं सम्वर्धन गर्दै समृद्ध, समुन्नत एवं सुरक्षित नेपाल निर्माणमा प्रहरीको सक्रिय योगदान भएको बताए । 

गत असार ११ गतेबाट सुरु भएको उक्त तालिममा १२ महिलासहित कुल ९५ जना प्रहरी निरीक्षकहरु सहभागी भएका थिए ।