एजेन्सी । चिनियाँ कम्पनी हुवावेले बिहिबार विश्वकै पहिलो फाइभ–जी मा आधारित बेस स्टेसन चिपसेट सार्वजानिक गरेको छ । ‘टिआङआङ’ नाम दिइएको उक्त चिपसेटले कम्प्युटरको काम गर्ने क्षमतालाई २५० प्रतिशतले बढाइदिने चिनियाँ राष्ट्रिय संचार सिजिटिएनले जनाएको छ । साथै यसले २०० मेगा हर्टजको ब्यान्डविथ पनि सपोर्ट गर्ने हुँदा भविष्यमा द्रुत गतिको इन्टरनेट ( हाइ स्पीड इन्टरनेट) को माग पनि पूरा गर्न सक्ने बताइएको छ ।
कम्पनीले हालसम्म फाइभ–जीका लागि तीस कन्ट्राक्टहरु प्राप्त गरिसकेको र २५ हजार भन्दा बढी बेस स्टेसनहरु विश्वव्यापी रुपमा विक्री गरिसकेको हुवावोका प्रमुख कार्यकारी अधिकृत रायन डिङले बताएका हुन् । त्यसैगरी हुवावेले नै लन्च गरेको पहिलो फाइभ–जी मोडेम ‘बलोङ ५०००’ लाई पनि विश्वकै शक्तिशाली बताइएको छ जसले ‘एनएसए’ र ‘एसए’ दुवै फाइभ–जी नेटवर्क आर्किटेक्चरलाई सपोर्ट गर्ने बताइएको छ ।
टिआङआङ भने अहिलेका चिपसेटहरु भन्दा ५० प्रतिशत सानो, २३ प्रतिशत हलुको र २१ प्रतिशतले कम बिजुली खपत गर्ने बताइएको छ । साथै यसलाई इन्स्टल गर्न पनि अन्य भर्जनहरुको तुलनामा आधा समय मात्र लाग्ने दाबी गरिएको छ । कम्पनीले यसअघि निर्माण गरेका चिपसेट आफ्ना महङ्गा फोन र उत्पादनहरुमा प्रयोग गर्दै आएको छ तरपनि इन्टेल र क्यालकम जसरी पूर्ण रुपमा सेमिकन्डक्टरको व्यापार गर्न नचाहेको बताएको छ ।
विश्वव्यापी रुपमा विभिन्न ढङ्गले आलोचित हुनु परेपनि हुवावेले २०१८ मा ५२ अर्ब डलर बराबर व्यापार गरेको छ र आफ्ना प्रिमियम स्मार्टफोनहरुको मागमा पनि लगातार वृद्धि भइरहेको जनाएको छ । यसरी व्यापारका हिसबाले हुवावेमा ५० प्रतिशत वृद्धि देखिएको छ । तर टेलिकम्युनिकेसन उपकरणको सबैभन्दा ठूलो उत्पादक मानिएपनि हुवावेले अमेरिकाको आरोपका कारण फाइभ–जी विकासमा भने थुप्रै चुनौतिको सामना गर्नु परिरहेको छ ।
अमेरिकालाई समर्थन गर्दै अष्ट्रेलिया, न्युजिल्यान्ड लगायत थुप्रै देशहरुले हुवावेका फाइभ–जी उपकरणमाथि प्रतिबन्ध लगाइसकेका छन् । तर कम्पनीका प्रमुख डिङले भने हुवावेसँग प्राविधिक उद्योगकको अग्रणी क्षमता रहेको दाबी गरेका छन् र यता फाइभ–जी नेटर्वक प्रणालीको सञ्चालनमा पनि यसले ठूलो उपलब्धी हासिल गरेको बताएका हुन् ।