काठमाडौं । उपकप्तान सीता रानामगरको ४८ तथा इन्दु बर्माको अविजित ३७ रनमा इन्डोनेशियालाई ९२ रनले पराजित गर्दै नेपाल थाइल्यान्डमा जारी वुमन ट्वान्टी–२० स्म्यासको फाइनलमा प्रवेश गरेकोे छ ।
समूहका खेलमा शतप्रतिशत नतिजासहित सेमिफाइनलमा पुगेको नेपालले अपराजित यात्रालाई कायम राख्ने क्रममा इन्डोनेशियामाथि ९२ रनको शानदार जित निकालेको हो । थाइल्याण्ड क्रिकेट एशोसिसनको मैदानमा १ सय २० रनको लक्ष्य पछ्याएको इन्डोनेशिया ११ दशमलब १ ओभरमा २७ रनमा अलआउट भयो ।
इन्डोनेशियाका लागि ओपनर युलिया अग्रेनीले १३ रन बनाउनु बाहेक अन्यले दोहोरो रन बनाउन सकेन् । चार खेलाडी खाता नै नखोली पेभेलियन फर्किँदा तीन खेलाडीले २–२ रन बनाएकी थिइन् । इन्डोनेशियाले पाँच रन अत्तिरिक्त पाएको थियो । इन्डोनेशियाका खेलाडीलाई सस्तैमा रोक्न नेपालकी कप्तान रुबिना क्षेत्रीले सर्वाधिक ४ विकेट लिइन् । कबिता कुँवर,नेरी थापा,उपकप्तान सिता रानामगर र सरीता मगरको नाममा १–१ विकेट रह्यो ।
यसअघि टस हारेर पहिला ब्याटिङ गरेको नेपालले निर्धारित ओभरमा ३ विकेटको क्षतिमा १ सय १९ रन बनाएको थियो । ओपनर काजल श्रेष्ठले १४ रन र उपकप्तान सिता रानामगरले ४८ रन बनाएकी थिइन् । योसंगै उपकप्तान रानामगरले जारी प्रतियोगितामा नेपालबाट सर्वाधिक १ सय २५ रन बनाएकी छन् ।
जारी प्रतियोगितामा उनले ७ विकेट लिएकी छन् । अर्धशतकका लागि दुइ रन बाँकी रहँदा सिता रनआउट भएकी थिइन् भने ओपनर काजल क्याचआउट भएकी थिइन् । त्यसपछि क्रिजमा आएकी इन्दु बर्माले अविजित ३७ रन जोड्दा नेरी थापा पाँच तथा कप्तान रुबिना क्षेत्री २ रनमा अविजित रहिन् ।
उपकप्तान सिता रानामगरको अलराउन्ड प्रदर्शन प्रेरित नेपाली राष्ट्रिय महिला क्रिकेट टोलीले अब शनिबार फाइनलमा समूह बिको विजेता थाइल्याण्ड र यूएईबीचको विजेतासँग प्रतिस्पर्धा गर्नेछ । दोस्रो सेमिफाइनलमा अहिले थाइल्याण्ड र यूएई खेल्दैछन् ।
प्रतियोगितामा कठिन प्रतिस्पर्धा गर्नु नपरेको नेपालले समूह एको को अन्तिम खेलमा आयोजक थाइल्यान्ड ‘ए’ टिमलाई ९ विकेटले पराजित गरेको थियो । समूहको पहिलो खेलमा चीनलाई १० विकेटले पराजित गरेको थियो । दोस्रो खेलमा मलेसियालाई ६ विकेटले पराजित गरेको नेपालले तेस्रो खेलमा युनाइटेड अरब इमिरेट्स (यूएई)लाई पनि ६ विकेटले हराएको थियो । नेपालले यूएईलाई हराउन अन्तिम ओभरसम्म खेल्नुपरेको थियो ।
त्यसबाहेक नेपालले अन्य खेलमा जितका लागि संघर्ष गर्नु परेको छैन । यस प्रतियोगिता लगत्तै नेपालले थाइल्याण्डमै आयोजना हुने आईसीसी ट्वान्टी–२० विश्वकप छनोट प्रतियोगिता खेल्नेछ । अभिभावक संस्था नेपाल क्रिकेट संघ (क्यान) निलम्बनमा रहेका बेला अन्तर्राष्ट्रिय क्रिकेट परिषद (आईसीसी)ले महिला क्रिकेट टोलीलाई यो अवसर दिएको हो ।
