एजेन्सी । टोम लाथम र हेनरी निकोलसले शतक बनाएपछि न्युजिल्यान्डविरुद्धको दोस्रो टेस्टमा ६ सय ६० रनको विशाल लक्ष्य पछ्याएको श्रीलंकाले शुक्रबार तेस्रो दिन सकिँदा २४ रन बनाएर २ विकेट गुमाइसकेको छ ।
क्राइष्ट चर्चमा बक्सिङ डेका दिन शुरु टेस्टको पहिलो दुई दिन २२ विकेट गएको थियो । तर त्यही पिचमा शुक्रबार भने विकेट झरेन । लाथम र निकोलसले शतक बनाउँदा कोलिन डी ग्रान्डहोमले अक्रामक ब्याटिङ गर्दै अर्धशतक पूरा गरे । न्युजिल्यान्डले ५८५–४ को स्थितीमा दोस्रो इनिङ समाप्तिको घोषणा ग¥यो । ग्रान्डहोम ७१ रनमा अविजित रहे भने निकोलसले अविजित १ सय ६२ रन बनाए । ६ सय ६० रनको लक्ष्य पछ्याएको श्रीलंकाले तेस्रो दिन सकिँदा २४ रन जोडेर २ विकेट गुमाइसकेको छ ।
न्युजिल्यान्डले शुक्रबार २३१–२ को स्थितिबाट तेस्रो दिनको सुरुआत गरेको थियो । भ्रमणकारी टोलीका लहिरु कुमाराले रोस टेलरलाई ४० रनमा आउट गर्दै राम्रो सुरुआत गरेको थियो । २५ रनको स्थितीबाट तेस्रो दिनको सुरुआत गरेका रोस टेलरले थप १५ रन मात्र जोड्न सके । त्यसपछि श्रीलंका बलरमाथि घरेलु ब्याट्सम्यान पूर्ण रुपले हावी बने । लाथमले ७४ रनको स्थितीबाट तेस्रो दिन थालेका थिए । लाथमले १७६ रन बनाए । १७ चौका र १ छक्का हानेका लाथमलाई दुशमान्था चमीराले निरोशन दिकवालामार्फत क्याच गरेका थिए । त्यसपछि निकोलसले १६ चौकासहित अविजित  १ सय ६२ रन बनाए । ग्रान्डहोम ७१ रनमा अविजित रहे । 
६ सय ६० रनको लक्ष्य पछ्याएको श्रीलंकाले सुखद् शुरुआत गर्न सकेन । धनुष्का गुनथिलका ४ रन बनाएर आउट भए भने दिमुथ करुणारत्नेले रन जोड्न सकेनन् । गुणथिलकालाई ट्रेन्ट बोल्टले र करुणारत्नेलाई टिम साउथीले विकेटकिपर विजे वाटलिङमार्फत् क्याच गरेका थिए । तेस्रो दिन सकिँदा दिनेश चन्डीमल १४ तथा कशल मेन्डिस ६ रन बनाएर क्रिजमा छन् ।
टस जितेर ब्याटिङका लागि निम्त्याइएको न्युजिल्यान्डले पहिलो इनिङमा १७८ रन बनाएको थियो भने श्रीलंकाले १ सय ४ रन जोडेको थियो । वेलिङ्टनमा भएको पहिलो टेस्ट बराबरीमा टुंगिएको थियो ।