काठमाडौं । निर्मला पन्त हत्या प्रकरणमा पक्राउ परेका कञ्चनपुर भीमदत्तनगरका युवा प्रदीप रावल थुनामुक्त भएका छन् । जिल्ला प्रशासन कार्यालय काठमाडौंले उनलाई थुनामुक्त गर्न आदेश दिएको हो ।
प्रदीप गत मंसिर २० गते काठमाडौंबाट पक्राउ परेका थिए । रावलमाथि प्रहरीलाई अभद्र व्यवहार गरेको आरोपमा महानगरीय प्रहरी वृत्त महाराजगञ्जले मुद्दा चलाएको थियो । प्रहरी प्रवक्ता एसएसपी उत्तम सुवेदीले भने, ‘‘तत्काल थुनामा राखेर अनुसन्धान गर्न आवश्यक देखिएन । डीएनए फाइल खोलिएको छैन । निर्मला प्रकरणको अनुसन्धान जारी छ ।’’
शुक्रबारमात्रै भीमदत्तनगर–१८ कै विशाल चौधरी थुनामुक्त भएका थिए । प्रहरी अधिकारीले निर्मला हत्यामा प्रदीप र विशालकै संलग्नता रहेको आशंका गर्दै आएका थिए । प्रदीप र विशालमाथि केन्द्रीय अनुसन्धान व्युरोले काठमाडौंबाटै अनुसन्धान गरिरहेको थियो । दुवैले निर्मलाको बलात्कारपछि हत्या गरेको बयान दिएको थिए ।