काठमाडौं । लगातार तीन खेलमा जित निकालेको संकटा क्लबले बिहीबार सहिद स्मारक ‘ए’ डिभिजन लिगअन्तर्गत आठौं चरणको खेलमा हिमालयन शेर्पाविरुद्ध प्रतिस्पर्धा गर्दा पुछारको क्लब न्युरोड (एनआरटी) पहिलो जित निकाल्ने लक्ष्यमा हुनेछ ।
चौथो चरणको खेलमा त्रिभुवन आर्मी क्लबसँग ५–१ को फराकिलो अन्तरमा पराजय भोगेको संकटा बाँकी सबै खेलमा विजयी नतिजा निकाल्दै तेस्रो स्थानमा छ । त्रिभुवन आर्मीबाहेक ठुला भनिएका क्लबको सामना नगरेको संकटा बिहीबार एन्फा मुख्यालयमा लगातार चौथो जित निकाल्ने लक्ष्यमा छ ।
संकटा क्लबमा खासै ठुला नाम नभए पनि लिगमा राम्रो नतिजा निकाल्दै आएको छ । ७ गोल खाएर विपक्षी पोष्टमा ११ गोल गरेको संकटा बिदेशी खेलाडीबाट प्रेरित छ । संकटाजस्तै हिमालयन शेर्पाले पनि ठुला क्लबविरुद्ध आफुलाई परिक्षण गरेको छैन । लिगका सातमध्ये ३ मा जित २ मा हार र २ खेलमा बराबरी खेलेको हिमालयन शेर्पा ११ अंकका साथ छैटौं स्थानमा छ ।
२०७० सालमा एनआरटी आर्थिक कारण देखाउँदै ‘ए’ डिभिजन लिग नखेलेपछि ‘बी’ डिभिजन लिगमा झरेको थियो । यसै सिजन उपविजेता बन्दै ‘ए’ डिभिजन लिगमा उक्लिएको एनआरटी पहिलो जितका लागि संघर्ष गरिरहेको छ । पहिलो खेलमै त्रिभुवन आर्मी क्लबलाई २–२ को बराबरीमा रोकेको एनआरटीले त्यसयता त्यही लय कायम गर्न सकेको छैन । विवादास्पद खेलमा उपाधि दाबेदार मानिएको त्रिभुवन आर्मीका सन्तोष लामाले अन्तिम मिनेटमा फ्रिकिकबाट गोल गरेपछि एनआरटीले अंक बाड्नु परेको थियो । बाँकी खेलमा एनआरटीको चुनौती फिका बन्दै आएको छ । एनआरटीले बिहीबार एन्फा मुख्यालयमै अर्को संघर्षरत टोली सरस्वती युथसँग प्रतिस्पर्धा गर्नेछ । दुई खेल जितेको सरस्वती ६ अंकका साथ नवौं स्थानमा छ ।
बिहीबारै हल्चोकस्थित घरेलु मैदानमा सशत्र प्रहरी बल (एपिएफ) ले जावलाखेल युथ क्लबसँग प्रतिस्पर्धा गर्नेछ । पछिल्ला दुई खेलमा लगातार विजय हासिल गरेको एपिएफ त्यहि लयलाई कायम राख्ने लक्ष्यमा हुनेछ । सुरुआती खेलमा खराब नतिजाबाट गुज्रिए पनि पछिल्ला जितले उत्साहित एपिएफ घरेलु मैदानमा स्पष्ट ३ अंक जोड्ने लक्ष्यमा हुँदा जावलाखेल युथ भने प्रदर्शन सुधार्ने प्रयासमा हुनेछ ।
१० अंकका साथ आठौं स्थानमा रहेको एपिएफले ७ मध्ये ३ मा जित ३ मा हार र १ खेल बराबरी खेलेको छ । पाँच खेलमा पराजय भोगेको जावलाखेल १ मा जित र १ खेलमा बराबरीको नतिजासहित ४ अंकका साथ ११औं स्थानमा छ ।