काठमाडौं । फागुनमा घरेलु मैदानमा हुने पाँचौं महिला साफ च्याम्पियनसिपका लागि महिला टोलीले आजबाट प्रशिक्षण सुरु गरेको छ ।
मैदान अभावमा महिला टोलीले घरमै हुने प्रतियोगिताका लागि समयमा तयारी गर्न पाएको थिएन । सातोबाटोस्थित एन्फा कम्प्लेक्स र हल्चोकस्थित सशस्त्र प्रहरी बलको मैदानमा सहिद स्मारक ‘ए’ डिभिजन लिग चलिहरेका कारण महिला टोलीले तयारीका लागि मैदान पाएको छैन् । लिगमा आज खेल नरहेकाले प्रशिक्षण सुरु गरिएको बताउँदै भोलिबाट बिहानको समयमा तयारी गर्ने प्रशिक्षक हरी खड्काले बाह्रखरीलाई जानकारी दिए । उनका अनुसार प्रशिक्षणमा ३३ जनालाई बोलाइए पनि आज १९ खेलाडीमात्र सहभागी भएका थिए ।
राष्ट्रिय टोलीमा प्रधान सेनापति महिला फुटबलमा उत्कृष्ट प्रदर्शन गरेका केही नयाँ खेलाडी र उमेर समुहका खेलाडी थपेर तयारी थालेको प्रशिक्षक खड्काले बताए । च्याम्पियनसिपको खेलतालिका यसअघि नै सार्वजनिक भइसकेको छ । जसमा नेपाल, बंगलादेश, भुटान र पाकिस्तान समूह ‘ए’मा छन् । समूह ‘बी’मा भारत, माल्दिभ्स र श्रीलंका छन् । यसअघि पुषमा श्रीलंकामा साफ चयाम्पियनसिप हुने तय थियो । तर आन्तरिक कारण जनाउँदै श्रीलंकाले गर्न नसक्ने बताएपछि दक्षिण एशियाली फुटबल महासंघ (साफ)ले नेपाललाई आयोजनाको जिम्मा दिएको थियो । आयोजकको जिम्मेवारी पाएपछि अखिल नेपाल फुटबल संघ (एन्फा) महिला साफ बिराटनगरमा गर्ने गरी तयारीमा थालेको छ ।