काठमाडौं । आतंकवादीहरूलाई समर्थन गरेको आरोप लगाउँदै साउदी अरब र बहराइनसहित मध्यपूर्वका ४ देशले कतारसँग सम्बन्ध तोड्ने निर्णय गरेका छन् । यो निर्णयले खाडीका अरब राष्ट्रहरूबीच बढिरहेको असहज सम्बन्धको झलक प्राप्त भएको दैनिक हिन्दूस्तानको समाचारमा जनाइएको छ ।
बहराइनको विदेश मन्त्रालयले सोमबार एक विज्ञप्ति जारी गर्दै आफ्नो देशले कतारको दोहाबाट ४८ घन्टाभित्र आफ्नो राजनीतिक मिसनलाई फिर्ता बोलाउन लागेको बताएको छ । यसै अवधिमा कतारका सबै कूटनीतिज्ञहरूलाई बहराइन छोड्न पनि मन्त्रालयले आदेश दिएको छ ।
समाचारअनुसार बहराइनले कतारका सबै नागरिकलाई दुई हप्ताभित्र बहराइन छोड्न निर्देशन दिनुका साथै दुबै देशबीच हवाइ र समुद्री यातायात बन्द गर्ने निर्णय गरेको छ ।
बहराइनले कतारका सञ्चार माध्यमका उत्तेजक गतिविधि, आतंककारी गतिविधिलाई कतारले दिएको समर्थन र बहराइनमा तोडफोड गर्न कतारले उक्साइरहेका कारण आफूले यस्तो निर्णय लिएको जनाएको छ । यसबारे कतारको प्रतिक्रिया अझै बाहिर आएको छैन ।