काठमाडौं । अफगानिस्तानको राजधानी काबुलमा विदेशी दूतावासहरूको नजिकै ठूलो विस्फोट भएको समाचार बीबीसीले प्रेषित गरेको छ । विस्फोट भएको क्षेत्रमा राष्ट्रपतिको आवाससमेत रहेको र उक्त विस्फोटले १०० मिटर वरिपरिका घरहरूलाई नोक्सान पुगेको समाचारमा उल्लेख छ । 

दैनिक भास्करले उक्त विस्फोट काबुलमा भारतीय राजदूतावासको नजिकै भएको जनाएको छ । विस्फोटमा परी दुई जनाको मृत्यु भएको समाचारमा उल्लेख छ । अफगानिस्तानको सार्वजनिक स्वास्थ्य मन्त्रालयका अनुसार घटनामा झन्डै ९० जना घाइते भएका छन् । समाचारमा उक्त विस्फोटमा इरानी राजदूतावासलाई निसाना बनाइएको उल्लेख छ । 

घटनाबारे ट्विट गर्दै भारतीय विदेश मन्त्री सुषमा स्वराजले सबै भारतीय कर्मचारीहरू सुरक्षित रहेको बताएकी छन् । अफगानिस्तानको समाचार एजेन्सी टोलो न्युजका अनुसार हमलामा मारिने र घाइते हुनेमा अधिकांश व्यक्तिहरू सर्वसाधारण छन् । यसअघि शनिबार पनि अफगानिस्तानको खोस्त सहरमा कारबम विस्फोट भएको थियो, जसमा १८ जनाको मृत्यु भएको थियो ।

शनिबार नै सुरक्षाकर्मी र आतंकवादीहरूबीचको मुठभेडमा ३६ जनाको मृत्यु भएको थियो भने शुक्रबार तालिबान आतंककारीहरूले कन्दहारको एउटा सैनिक शिविरमा आक्रमण गर्दा १५ सैनिक मारिएका थिए ।    

बुधबार (आज) को विस्फोटपछि कालो धुँवाको मुस्लो आकाशमा देखिएको थियो । घटनामा कोही हताहत भए नभएको खबर अझै आएको छैन ।