न्युयोर्क । ट्विटरका नयाँ मालिक तथा विश्वका सर्वाधिक धनी अर्बपति एलोन मस्कले अमेरिकाका पूर्वराष्ट्रपति डोनाल्ड ट्रम्पको निजी ट्विटर एकाउन्ट पुनःस्थापना गरेका छन् ।
मस्कले ट्विट गरेका छन्, “ मानिसहरुले बोलेका छन् । १ करोड ५० लाखभन्दा बढी ट्विटर प्रयोगकर्तामध्ये ५१ दशमलव ८ प्रतिशतले ट्रम्पको ट्विटर एकाउन्टमा लगाइएको प्रतिबन्ध हटाउन मतदान गरेका छन् ।”
तर, ट्रम्प यस प्लेटफर्ममा नफर्कने सम्भावना बढी छ । किनभने यसअघि नै ट्रम्पले ट्विटरमा फर्कनु पर्ने आफूले कुनै कारण नदेखेको बताइसकेका बीबीसीले लेखेको छ ।
हिंसा भड्काउन सक्ने खतराको कारण सन् २०२१ मा उनको ट्विटर एकाउन्ट निलम्वन गरिएको थियो । २०२१ को ६ जनवरीमा ट्रम्पका समर्थकहरु वासिंगटन डीसीस्थित अमेरिकी क्यापिटल भवनमा प्रवेश गरेको केही दिनपछि ट्विटरको पूर्व व्यवस्थापनले सो कारबाही गरेको थियो ।
जो बाइडेनलाई राष्ट्रपतीय निर्वाचनमा विजय हासिल गरेकोमा औपचारिक प्रमाणपत्र दिने तरखर भइरहेका बेला सयौँ दंगावाज अमेरिकी कंग्रेसमा प्रवेश गरेका थिए । त्यसबेला भएको हिंसात्मक घटनामा चारजना सर्वसाधारण र एकजना प्रहरीको ज्यान गएको थियो ।