काठमाडौं । नेपाल प्रहरीले काठमाडौंमा हुने चोरीका सन्दर्भमा अनौठा तथ्यहरू फेला पारेको छ । प्रहरीले चोरहरूको बानी व्यवहार र चोरीको विशेष दिनका सन्दर्भमा गरेको अध्ययनका आधारमा थाहा भएअनुसार सोमबार चोरहरू सबैभन्दा धेरै सक्रिय हुन्छन् भने शुक्रबार र शनिबार सबैभन्दा कम । 

महानगरीय प्रहरी परिसर काठमाडौंको तथ्यांकअनुसार चोरहरू आइतबार, सोमबार र मंगलबार बढी सक्रिय हुन्छन् । त्यसमा पनि सोमबारको घटना अरु दिनभन्दा धेरै देखिएको छ । सबैभन्दा बढी चोरीका घटना भएका केही महिनाको तथ्यांक केलाउँदा हप्ताका सात दिनमा सोमबार करिब २२ प्रतिशत चोरीका घटना भएको देखिएको छ । त्यस्तै, आइतबार र मंगलबार पनि करिब १८ प्रतिशत चोरीका घटना भएको देखिन्छ । बिहीबार १८ प्रतिशत र बुधबार १२ प्रतिशत घटना हुने गरेका छन् । तर, शुक्रबार भने ९ प्रतिशत र शनिबार ५ प्रतिशतमात्र चोरीका घटना हुने गरेका छन् । 

हप्ताको पहिलो तीन दिन मानिस काममा जान उद्दत रहने तर पछिल्लो दुई दिन बिदा बस्ने सम्भावना हुनाले चोरले यस्तो रणनीति बनाएको हुन सक्ने प्रहरीको अनुमान छ । शुक्रबार कतिपय स्कुलमा हाफ छुट्टी हुने र शनिबार सबैजना घरै बस्ने हुनाले चोरी कम हुने प्रहरीको भनाइ छ । 

महानगरिय प्रहरी परिसर काठमाडौंका प्रमुख वरिष्ठ प्रहरी उपरीक्षक विक्रम थापाले अझ अनौठो तथ्य फेला पारेका छन् । “कतिपय चोर त पत्रिकामा आफ्नो राशीफल हेरेर ‘काममा सफलता’ भनेको दिनमात्र चोरीमा निस्किने रहेछन्,” उनले भने । तर, धेरै चोरी दिउँसो हुने भएकाले शुक्रबार र शनिबारचाहिँ चोरहरू राशीफलमा लेखेको भए पनि सकभर चोरी गर्न आँट नगर्ने थापाले बताए ।

 

अधिकांश नेपालीमा साँझ परेपछि चोर धेरै सलबलाउने सोच हुन्छ । कतिपय अवस्थामा चोरीलाई रातको र अँध्यारोको पेसा पनि भन्ने गरिन्छ । तर, काठमाडौंमा समातिएका चोरहरूको घटना विवरणअनुसार उनीहरू पनि अधिकांश मानिसजस्तै रातभर आरामले घरमै सुत्छन् । यस्तो गलत पेशामा लागेका व्यक्ति पनि जागिरे मान्छेजस्तै बिहानको ९ बजे खाना खाईवरी करिब १० बजेतिर चोरी गर्न ताकेको घरवरिपरि पुग्छन्, स्थितिको जायजा लिन्छन् र मध्यान्हमा चोरी गर्न लुसुक्क घरभित्र छिर्छन् । 

महानगरीय प्रहरी परिसरले गरेको अध्ययनअनुसार १२ बजेदेखि ४ बजेसम्म चोरीका घटना अत्यधिक हुने गरेका छन् । यो समयमा करिब ५० प्रतिशत चोरी हुने गरेको देखिन्छ । कतिपय चोर बिहान मर्निङ वाकको समयदेखि नै चोर्न पनि निस्किन्छन् । बिहान ६ बजेदेखि १२ बजेसम्म कुल चोरीको १८ प्रतिशत चोरी हुने देखिएको छ । बाँकी चोरी भने साँझ र रातको समयमा हुने गरेका छन् । रातको समयमा भने घरधनी छैनन् भन्ने पक्का भएको घरमा चोर पस्छन् । 

 

पहिले–पहिलेका चोरहरूले भाँडाकुँडा, कपडा, टिभी आदि चोर्ने गरेको भए पनि अहिलेका चोर त्यस्ता कुरामा ध्यान दिँदैनन् । मोबाइल, ट्याब्लेट, आइप्याड र ल्यापटप पनि अहिलेका चोरहरूले छुँदैनन् । “चोरहरूले नगद र गरगहनाबाहेक सामानमा ध्यान नदिएको देखिएको छ । मोबाइल, ट्याब्लेट, आइप्याड आदि ‘लोकेट’ गर्न सकिने चोरहरूले बुझिसकेका छन्,” एसएसपी थापा भन्छन् ।

प्रहरीको अध्ययनअनुसार बौद्ध, जोरपाटी र कपन बढी चोरी हुने क्षेत्रमा अंकित छन् । यी क्षेत्रमा किन बढी चोरी हुन्छ भन्ने विषयमा भने अझै अध्ययन भइसकेको छैन । त्यस्तै, चोरीमा संलग्न हुनेमा सबैभन्दा बढी सिन्धुपाल्चोकका र त्यसपछि रामेछाप रहेको तथ्यांक छ ।