काठमाडौं । अमेरिकी अन्तरिक्ष एजेन्सी नासाका एक अन्तरिक्ष यात्रीले अमेरिकी राष्ट्रपतिको चुनावमा अन्तरिक्षबाट पनि मत खसालेको समाचार संस्था एएफपीले जनाएको छ । नासाले सोमबार जनाएअनुसार हाल अन्तर्राष्ट्रिय अन्तरिक्ष केन्द्रमा रहेका अन्तरिक्ष यात्री शेन किम्ब्राले भोट खसालेका हुन् । 

उनी १९ अक्टोबरमा काजाकस्थानको बेकानुरबाट रुसी सोयुज रकेटबाट अन्तरिक्ष यात्रामा गएका थए । उनी ४ महिना अन्तरिक्षमै रहने बताइएको छ । टेक्सास कानुनमा १९९७ देखि अन्तरिक्ष यात्रीले पनि अमेरिकी राष्ट्रपतीय निर्वाचनमा मत खसाल्न पाउने प्रावधान छ । अमेरिकी अन्तरिक्ष यात्री डेभिड वल्फ अन्तरिक्षबाट मत खसाल्ने पहिलो व्यक्ति थिए । उनले रुसी अन्तरिक्ष स्टेसन मीरबाट मत खसालेका थिए ।

अमेरिकी राष्ट्रपति चुनावमा मत खसाल्ने पहिलो व्यक्ति भने लेराय चियाओ हुन । उनले २००४ मा राष्ट्रपतिको चुनावमा मतदान गरेका थिए । 

अन्तरिक्षबाट मत खसाल्नका लागि विद्युतीय ई–मेल सिस्टमको व्यवस्था गरिएको हुन्छ । यसका लागि सबैभन्दा पहिले मिसन कन्ट्रोल सिस्टमबाट स्पेस स्टेसनमा अन्तरिक्ष यात्रीको सुरक्षित एकाउन्टमा ई–मेल पठाइन्छ । अन्तरिक्ष यात्रीले यसैमा मत खसालेर ई–मेल फर्काउने गर्छन् । अन्तरिक्ष यात्रीले कुन पार्टीलाई भोट हालेको भन्ने खुलाइएको छैन ।