काठमाडौं । रणविर कपुर, ऐश्वर्या राय बच्चन तथा अनुष्का शर्मा अभिनित सिनेमा ‘ए दिल है मुश्किल’ ले प्रर्दशनीको पहिलो दिनमै भारु १३ करोड कलेक्शन गरेको इन्डियन एक्सप्रेस पत्रिकाले जनाएको छ । 

चर्चित बलिउड निर्देशक करण जौहरको यो सिनेमा गत महिना देखि विवादमा परेको थियो । विवादकै कारण  कतिपय स्थानमा देखाउन नदिने शिव सेनाले घोषणा गरेको थियो । तर, अन्तिम समयमा सबै विवाद मिलेपछि रिलिज भएको सिनेमाले कस्तो व्यापार गर्ला भन्नेमा धेरैको चासो थियो ।

पाकिस्तानी कलाकार फवाद खानको यो सिनेमामा सानो भूमिका भएका कारण भारतको कट्टर हिन्दुवादी दल शिव सेनाले चर्को विरोध जनाएको थियो ।

यस सिनेमाकी अभिनेत्री अनुष्का शर्माले मात्र हालैका दिन आमिर खान तथा सलमान खानसँग सफल सिनेमा दिन सकेकी छिन् । रणवीर कपुर विगतका केही सिनेमा नचलेको कारण उनी एक प्रकारले समस्यामा परेका र ऐश्वर्या राय पनि सिनेमामा फर्केपछिको पहिलो फिल्म जज्बाले सोचेजस्तो व्यापार गर्न सकेको थिएन ।

बलिउडका सिनेमा समीक्षक तरण आदर्शले टुइट गरेअनुसार यो सिनेमाले धनतेरासको दिन तथा दिवालीको शुरुआत भएता पनि राम्रो व्यापार गरेको छ । अब दिवाली भरी यो सिनेमाको व्यापार निकै बढ्ने समीक्षकले अपेक्षा छ । 

अजय देवगनको शिवाय सिनेमाको तुलनामा यो सिनेमाको व्यापार निकै राम्रो रहेको पनि बताइएको छ । यो सिनेमाको ट्रेलर रिलिज गरेको समय देखिनै विवाद भएका कारण पनि धेरैको यो सिनेमा प्रति रुची भएको तथा यसमा स्टारडम कलाकार भएको कारण मल्टिप्लेक्समा राम्रो व्यापार गर्ने अनुमान गरिएको छ ।

शिवाय तथा ए दिल है मुश्किल दुवै करिब २ हजार ८ सय देखि तीन हजारसम्म हलमा एकैपल्ट लागेको तर रणवीरको सिनेमा धेरै मल्टिप्लेक्समा लागेका छन् । ७० करोडमा बनेको ए दिल है मुश्किलले करिब १० देखि १५ करोड प्रचारमा खर्च भएको हुनसक्ने अनुमान गरिएको छ । यो सिनेमाले रिलिज हुनुअघिनै सिनेमा देखाउने अधिकार बेचेर ५० करोड भारु कमाइसकेको पनि इन्डियन एक्सप्रेसले लेखेको छ ।

यो सिनेमा करण जोहरले केही समयको अन्तरालमा बनाएका हुन् । यो सिनेमा बाट बलिउडमा निकै प्रभाव जमाउनका लागि जोहरले निकै मेहनत गरेका छन् ।