काठमाडौं । विकास श्रेष्ठले नेपाल ओपन स्नुकर प्रतियोगिताको उपाधि जितेका छन् । त्रिपुरेश्वरस्थित राष्ट्रिय खेलकुद परिषद्को कभर्डहलमा भएको ‘बेस्ट अफ एलेभेन’ को फाइनलमा विकासले सोम लामालाई ६–४ को फ्रेममा पराजित गरे ।

सुरुआतका दुई फ्रेम विकासले ९१–५२ र १११–२ ले आफ्नो पक्षमा पारे । त्यसपछिका लगातार तीन फ्रेम सोमले ११२–१६, १२०–० र ७३–२४ ले जित्दै खेलमा ३–२ को अग्रता हासिल गरेका थिए । छैटौंदेखि आठौं फ्रेम विकासले आफ्नो नाममा लेखाउँदै खेलमा ५–३ को अग्रता लिएका थिए । विकासले छैटौंमा ५२–४८, सातौंमा ५९–५३ र आठौंमा ६३–३३ स्कोर गरेका थिए । नवौं फ्रेम सोमले ८२–४२ ले आफ्नो पक्षमा पार्दै विकासलाई संघर्ष गर्न बाध्य बनाएका थिए । दसौं फ्रेम विकासले ९४–३२ ले जित्दै उपाधि सुनिश्चित गरे ।

उपाधिसँगै विकासले १ लाख १ हजार तथा सोमले ५० हजार नगद पुरस्कार पाए । तेस्रो भएका छोपेल शेर्पा र विकास महर्जनले १५–१५ हजार नगदमा चित्त बुझाए ।

नेपाल विलियर्ड, स्नुकर तथा पुल संघद्वारा आयोजित प्रतियोगितामा उपविजेता सोम प्रतियोगिताकै सर्वाधिक ब्रेककर्ता बने । उनले फाइनलको तेस्रो फ्रेममा गरेको ७५ अंकको ब्रेक नै प्रतियोगिताको सर्वाधिक ब्रेक बन्न पुग्यो । त्यसवापत उनले छुट्टै १० हजार नगद पुरस्कार हात पारे ।

विजेतालाई उद्योग मन्त्री नवीन्द्रराज जोशीलगायतले एक कार्यक्रमबीच पुरस्कृत गरे । दसदिने नकआउट प्रतियोगितामा ९८ खेलाडीले नकआउट आधारमा प्रतिस्पर्धा गरेका थिए ।