काठमाडौं । नेपाल क्रिकेट संघ (क्यान)को आयोजनामा  हुन लागेको नेपाल प्रिमियर लिग (एनपीएल) हरेक नेपालीको जिब्रोमै झुन्डिएको छ भन्दा फरक नपर्ला । 

मंसिर १५ गतेदेखि सुरु हुने प्रतियोगिताको अन्तिम तयारीमा क्यान लागिरहेको छ । प्रसारण अधिकार भारतीय टेलिभिजन च्यानल स्टार स्पोर्ट्सलाई दिएर चर्चा कमाएको क्यान हाल ट्रफीका कारण पनि बहसको विषय बनेको छ । 

प्रतियोगिताको पहिलो संस्करणमा सहभागी आठ टिमले राम्रा विदेशी खेलाडी भित्र्याउने होड नै चलाएका छन् ।

भारतीय पूर्वओपनर ब्याटर शिखर धवन, न्युजिल्यान्डका मार्टिन गप्टिल र जिम्मी निसम, वेस्ट इन्डिजका चान्डविक वाल्टन, अस्ट्रेलियाका बेन कटिङ, उन्मुक्त चन्द जस्ता विदेशी खेलाडीको आगमनले पनि प्रतियोगिताको पहिलो संस्करणलाई चर्चाको शिखरमा पुर्‍याएको छ । 

के–के देखिने छ त्रिविमा नयाँ ?
क्यानले एनपीएलकै लागि भनेर ६ महिनाअघिदेखि त्रिवि क्रिकेट मैदानको स्तरोन्नति सुरु गरेको बताउँछन् प्रवक्ता छुम्बी लामा । 

प्रतियोगिताअघि क्यानले त्रिवि मैदानको बाउन्ड्री लाइन केही बढाएको छ । टेलिभिजनमा प्रत्यक्ष प्रसारण स्टार स्पोर्ट्सबाट हुने भएसँगै प्रतियोगितामा करिब २० वटा क्यामराको प्रयोग हुने पनि प्रवक्ता लामाले खुलाइसकेका छन् । 

त्रिवि मैदान पुग्ने समर्थकले एनपीएलमा पहिलोपटक डिजिटल स्कोर बोर्डमा रन, विकेट र ओभर देख्न पाउने छन् । राष्ट्रिय खेलकुद परिषद् (राखेप)ले त्रिविमा डिजिटल स्कोर बोर्डको काम सम्पन्न गरिसकेको छ । 

यस्तै, क्यान यसअघिका प्रतियोगितामा पटक–पटक भोग्दै आएको गेट भत्कने समस्याको निकास खोज्ने प्रयास गरेको छ । त्यही समस्यालाई ध्यानमा राख्दै क्यानले पहिलोपटक त्रिवि मैदानमा समर्थकका निम्ति फरक–फरक फ्यान जोन तय गरेको छ । जसअनुसार खेल हेर्न पुग्ने समर्थकले फरक जोनमा पुग्न फरक–फरक गेटको प्रयोग गर्नुपर्ने छ । क्यानले भीआईपी दर्शकलाई अस्थायी प्यारापिटको समेत व्यवस्था गरेको छ । 

“विगतमा देखिएका समस्या र चुनौतीहरूलाई मध्यनजर गर्दै प्रतियोगिताको यस संस्करणमा हामीले व्यवस्थापनका केही उपाय अपनाएका छौँ,” प्रवक्ता लामाले भने, “यसपटक त्रिवि क्रिकेट मैदान पुग्ने समर्थकले केही फरक अनुभव गर्नेछन् । क्यान त्यसमा दत्तचित्त भएर लागेको छ ।”

कति पाउनेछन् विजेताले पुरस्कार ?
क्यानका प्रवक्ता लामाले पुरस्कारको विषयमा अन्तिम छलफल भइरहेको बाह्रखरीलाई बताए । “पुरस्कार रकमलाई लिएर अन्तिम छलफल भइरहेको छ । हामी अबको एक–दुई दिनमा यसबारे आधिकारिक जानकारी दिनेछौँ,” प्रवक्ता लामाले भने ।

यसअघि क्यानको तत्वावधानमा भएको नेपाल टी–२० मा विजेतालाई ५५ लाख रुपैयाँको पुरस्कार राशी राखिएको थियो ।

ब्रान्ड एम्बासडर र आधिकारिक गीत सार्वजनिक गर्ने होड
प्रतियोगिताका आठै टिम ब्रान्ड एम्बासडर र टोलीको आधिकारिक गीत सार्वजनिक गर्ने होडमा छन् । प्रतियोगिताका निम्ति कर्णाली याक्स, सुदूरपश्चिम रोयल्स, जनकपुर बोल्ट्स, विराटनगर किंग्स्, लुम्बिनी लायन्स, चितवन राइनोज, पोखरा एभेन्जर्स र काठमाडौं गुर्खाजले धमाधम क्लबको सद्भावना दूत र गीत सार्वजनिक गरिरहेका छन् ।

प्रतियोगिताका निम्ति केही क्लबले कलाकारलाई ब्रान्ड एम्बासडर बनाएका छन् । यस्तै, केही क्लबले पूर्व तथा वर्तमान खेलाडीलाई प्राथमिकतामा राखेका छन् ।

प्रतियोगितामा विराटनगरले कलाकार दयाहाङ राईलाई ब्रान्ड एम्बासडरमा नियुक्त गरेको छ । यस्तै, ‘भ्वाइस अफ विराटनगर’ मा र्‍याप गायक कुशल पोख्रेल तथा ‘फेस अफ किंग्स’ मा गायिका रचना रिमाल छिन् ।

जनकपुर रोयल्सको ब्रान्ड एम्बासडरमा पूजा महतो छिन् । पूजा नेपाली यू–१९ महिला क्रिकेट टिमकी कप्तान समेत हुन् ।

लुम्बिनी लायन्सले अभिनेता राजेश हमाललाई ब्रान्ड एम्बासडर बनाएको छ । पोखरा एभेन्जर्समा कलाकार सन्दीप क्षेत्री ब्रान्ड एम्बासडर छन् । काठमाडौंले नेपाली राष्ट्रिय महिला क्रिकेट टिमकी कप्तान इन्दु बर्मालाई नै ब्रान्ड एम्बासडर बनाएको छ ।

कर्णालीले नायिका स्वस्तिमा खड्कालाई ब्रान्ड एम्बासडर र युवामाझ चर्चित भ्लगर सिसन बानियाँलाई ‘युथ आइकन’को रूपमा भित्र्याएको छ ।

यस्तै, सुदूरपश्चिमले तेक्वान्दोका पूर्वखेलाडी तथा ओलम्पियन दीपक बिष्टलाई ब्रान्ड एम्बासडर बनाएको छ । चितवनले भने हालसम्म ब्रान्ड एम्बासडरमा कुनै पनि व्यक्तित्व सार्वजनिक गरेको छैन ।

त्रिवि क्रिकेट मैदानमा कुल २१ दिनसम्म सञ्चालन हुने प्रतियोगिताभर ३२ खेल हुनेछन् । जसमा लिग चरणमा २८, प्लेअफमा तीन र एक फाइनल खेल समावेश छन् ।