काठमाडौं । तपाईँ ट्राफिक प्रहरी नभएको मौका छोपेर ट्राफिक नियम मिचिरहनु भएको त छैन ? यदि त्यस्तो गर्दै हुनुहुन्छ भने तपाईँलाई ट्राफिक प्रहरीले घरबाटै ल्याएर पनि कारबाही गर्न सक्नेछ ।

काठमाडौं उपत्यकामा जडान गरिएका सीसीटीभी क्यामेरामा कैद गरिएका दृश्यका आधारमा महानगरीय ट्राफिक प्रहरी महाशाखाले त्यस्ता चालक/सवारीलाई कारवाही प्रक्रिया अगाडि बढाएको हो । महाशाखाले ट्राफिक नभएको बेला लेन मिच्ने लगायतका निमय उल्लंघन गरेका ९ हजार बढी व्यक्तिलार्ई सीसीटीभीकै फुटेजका आधारमा कारवाही गरिसकेको छ ।

महाशाखाका निमिक्त प्रमुख एसएसपी वसन्तकुमार पन्तका अनुसार ट्राफिक प्रहरीको अनुपस्थितिमा लेन मिच्ने क्रम बढेको पाइएको बताए । विभिन्न स्थानमा जडित क्यामेराबाट २ हजार ३२ र अन्य क्यामेराको सहयोमा ७ हजार ३८ जनालाई कारवाही गरिएको छ ।
उनले भने, “राम्रै शिक्षित व्याक्तिहरुबाटै नियम मिचेको पाइन्छ । यस्तो कार्य निरुत्साहित गर्न विशेष सचेतना कार्यक्रम ल्याउँदैछौं ।”

एसएसपी पन्तले उपत्यकाका विभिन्न स्थानमा जडान भएको सीसीटीभी र तिनै क्यामेराबाट महानगरीय प्रहरी कार्यालय रानीपोखरी र ट्राफिक महाशाखाले नियम मिच्नेको अनुगमन गरिरहेको बताए । उनले भने–“क्यामेरामा कैद दृश्य हेरेर यातायत व्यवस्था विभागबाट सवारी साधनको नम्बर र टेलिफोन नम्बर पत्ता लगाउँछौं । पहिले ति व्यक्तिलाई आग्रह गर्छौँ । नआए प्रहरी लगाएर समातेर ल्याँउछौं ।”

एसएसपी पन्तले अहिले ट्राफिक प्रहरीले प्रयोग गर्ने हेल्मेट, गाडी लगायतमा पनि क्यामेरा जडान गरिएको बताए । त्यस्ता क्यामेरामा पनि नियम मिच्नेहरुको भिडियो कैद हुन्छ ।  एसएसपी पन्तले यस्ता क्यामेराको सहयोगबाट आर्थिक वर्ष ०७४–०७५ को जेठसम्म ७ हजार ३८ सवारी साधनका चालकलाई कारवाही गरिएको बताए । 

यस्तो नियम मिच्ने ३ सय ५० टेम्पो चालकलाई पनि कारवाही गरिएको छ ।

यस्तै क्षमताभन्दा बढी यात्रु कोच्ने १२ सय ८२ माइक्रोबस पनि कारवाहीमा परेको एसएसपी पन्तले बताए । एसएसपी पन्तले उपत्यकामा हाल ३ सय ५० ट्राफिक प्रहरीको दरबन्दी रहेको र यो प्रर्याप्त नभएको बताए । 

ड्रोनबाट ट्राफिक व्यवस्थापनको अनुगमनको तयारी
 

महाशाखाका एसएसपी पन्त नेपालमा पनि ट्राफिक व्यवस्थापनमा प्रविधिको प्रयोग बढेको बताए । “सीसीटीभीको प्रयोग व्यापक गरेका छौं, अब आधुनिक प्रविधिहरु पनि बढाइरहेका छौं, सम्भवतः ड्रोन क्यामेराको प्रयोग छिट्टै हुन सक्छ,” बाह्रखरीसँगको कुराकानीमा उनले भने ।

मालबाहक ट्रकलाई रिङरोङभित्र छिर्न निश्चित समय

मालबाहक ट्रक जतिबेला पनि चक्रपथभित्र छिर्ने भएकाले पनि ट्राफिक जाम बढेको एसएसपी पन्त बताउँछन् । उनले ट्रकलाई अब जतिबेला पनि चक्रपथभित्र प्रवेश गर्ने क्रम रोक्न लागिएको बताए । उनले भने, “अब निश्चित समय तोकेरै अब मालवाहक ट्रक, ट्रिपरलाई चक्रपथभित्र प्रवेश गराउँछौं, अन्य समयमा चक्रपथ बाहिरै पार्किङ गर्न लगाउँछौं । यसले ट्राफिक व्यवस्थापनमा ठूलो सहयोग पुग्छ ।”
फाइल तस्बिर