धनगढी । नागरिकता विवादमा सांसदसँगै गृहमन्त्रीको पद गुमाएका रवि लामिछानेले निर्मला पन्त बलात्कार र हत्या अनुसन्धान आफ्नो पहिलो प्राथमिकता भएको बताएका थिए ।

लामिछानेकै निर्देशनमा डीआईजी दुर्गा सिंहको नेतृत्वमा नयाँ अनुसन्धान समिति पनि बन्यो । सो समितिले अनुसन्धान अगाडि बढायो । तर नयाँ तथ्य फेला पार्न सकेन ।

हालसम्म विभिन्न समयमा गरी एक दर्जन बढी प्रहरी अधिकृतहरुले निर्मला पन्त प्रकरणको अनुसन्धान गरिसकेका छन् । 

तर हत्यारासम्म पुग्ने सामान्य सुराक पनि प्रहरीले पाउन सकेको छैन । घटनाको सुरुवातदेखि नै केन्द्रीय अनुसन्धान ब्यूरो (सीआईबी)को टोली अनुसन्धानमा निरन्तर सक्रिय छ ।

तर सबैजसो टोली अपराधीको डीएनएकै खोजीमा छ । जुन हालसम्म कसैको पनि म्याच भएको छैन । ०७५ साउन १० गते कञ्चनपुरको भीमदत्तनगर २ कि १३ वर्षीया किशोरी निर्मला पन्त ‘नोट’ लिन साथीको घर गएकी थिइन् ।

उनी त्यहाँबाट भासी जाने भन्दै निस्किएकी थिइन् । तर साँझसम्म घर नफर्किएकी निर्मला साउन ११ गते घरभन्दा झन्डै डेढ किलोमिटरको दुरीमा रहेको उखुबारीमा मृत फेला परेकी थिइन् ।

तत्कालीन समयमा प्रहरी नेतृत्वमा सर्वेन्द्र खनाल थिए ।  त्यसपछि शैलेश थापा क्षेत्री, ठाकुरप्रसाद ज्ञवाली, धीरजप्रताप सिंहले प्रहरीको नेतृत्व गरिसकेका छन् ।

हाल प्रहरी नेतृत्वमा वसन्त कुँवर छन् । सबैजसो प्रहरी प्रमुखले आफ्नो प्राथमिकतामा निर्मला पन्त बलात्कार र  हत्याको अनुसन्धान रहेको बताउँदै आएका छन् ।

डेढ साताअघि मात्रै प्रहरी प्रमुखबाट अनिवार्य अवकाश पाएका आईजीपी धीरजप्रताप सिंहले निर्मला प्रकरणको अनुसन्धान निस्कर्षमा पुर्याउन नसकेकोमा दुःख लागेको बताए ।

पूर्वआईजीपी सिंहले भने, “मेरो कार्यकाल ठूला–ठूला अपराधका घटनामा हामीले सफलता प्राप्त गर्न सक्यौं । तर निर्मला प्रकरणलाई टुङ्गोमा पुर्‍याउन नसकिएकोमा मनमा बिझाइरहन्छ । तर ढिलोचाँडो अपराधी कानुनको दायरामा आउँछ ।”

तर अनुसन्धानमा संलग्न विभिन्न अधिकारीहरु निर्मला हत्याकाण्डको अनुसन्धानमा सफलता पाउने सम्भावना कम हुँदै गएको बताउँछन् । प्रमाण जुटाउन असम्भव जस्तै भएको उनीहरुको तर्क छ ।

निर्मला प्रकरणमा बेलाबेला प्रहरी अनुसन्धान विवादमा पर्दै आएको छ । प्रहरीले यो घटनालाई विभिन्न कोणबाट अनुसन्धान गरिरहेको जनाएको छ ।

प्रहरीले अहिलेसम्म डीएनए परीक्षणलाई नै मुख्य पाटो मानेको छ । हालसम्म एक सय बढीको डीएनए परीक्षण भइसकेको छ । 

तर कसैको पनि डीएनए निर्मलाको शरीरबाट निकालिएको स्वाबसँग मेल खाएको छैन । निर्मला प्रकरणको अनुसन्धानमा लापरबाही गरेको भन्दै तत्कालीन समयमा आधा दर्जन प्रहरी कारबाहीमा परेका थिए ।

अनुसन्धानमा चुकेको अवस्थामा आफुरुको जागिर पनि जोखिममा पर्ने डरले अनावश्यक जोखिम नमोलेको अनुसन्धानमा संलग्न रहेर फर्किसकेका उच्च तहका प्रहरी अधिकारीहरु बताउँछन् ।

प्रहरी अधिकारीले घटनामा छिमेकी, नजिकका आफन्त वा लागुऔषध प्रयोगकर्ताको संलग्नताको आशंका गर्दै आए पनि यसअघि पक्राउ परेका दिलिप विष्टमाथिको निगरानी पनि जारी राखेको छ ।

प्रहरीले भने ०७५ भदौमा ३९ वर्षीय दिलिपसिंह विष्टलाई अभियुक्तको रुपमा सार्वजनिक गरेको थियो । तर निर्मलाको स्वाबसँग डीएनए नमिलेपछि उनी छुटेका थिए । 

अझै केही प्रहरी अधिकारीहरु निर्मला हत्यामा दिलिपकै संलग्नताको दाबी गर्छन् भने केही अधिकारीहरु प्रमाणले दिलिपको अभियोग पुष्टि गर्न नसक्ने बताउँदै आएका छन् ।

दिलीप पक्राउ परेपछि प्रहरीले निर्दोषलाई फसाउन खोजेको भन्दै कञ्चनपुरमा आन्दोलन चर्किएको थियो ।  सो क्रममा आन्दोलनकारीमाथि प्रहरीले गोली चलाउँदा भीमदत्त–१८ का सन्नी खुनाको मृत्यु भएको थियो ।

प्रहरीले हालसम्म ७०० जनासँग सोधपुछ गरेको छ ।