काठमाडौं । गत माघ ९ गते युएईबाट अवैध रुपमा ल्याइएको साढे ३३ किलो सुन फेला पर्नेमा अनुसन्धानमा खटिएको टोली विश्वस्त रहेको पाइएको छ । अनामनगरबाट गायब भएको भनिएको साढे ३३ किलो सुन र त्यसैसँग जोडिएर सनम शाक्यको हत्या भएपछि सुन र सनमकाण्ड बाहिर आएको थियो ।

हराएको सुन व्यापारी एमके अग्रवालको भएको पक्राउ परेकाले बयानका क्रममा र अनुसन्धान समितिले पनि उनैको भएको निष्कर्ष निकालेको छ । सुन व्यवस्थापनको जिम्मा चुडामणि उप्रेती ‘गोरे’को थियो । मोरङ जिल्ला अदालतमा सुन तस्करी र सनम हत्यालाई जोडेर संगठित अपराध ऐन अन्र्तगत मुद्दा चलिरहेको छ ।

तर अहिलेसम्म हराएको सुन फेला नपार्दा समितिको अनुसन्धान प्रक्रियामाथी औँला ठडिएपछि समितिले पनि हराएको भनिएको साढे ३३ किलो सुनको नजिक अनुसन्धान पुगेको बताएको छ । यद्यपी सुन फेला नपरेसम्म केही बताउन नसकिने समिति स्रोत बताउँछ ।

गृह मन्त्रालयका सह–सचिव ईश्वरराज पौडेल नेतृत्वको विशेष अनुसन्धान टोलीले घटनाको अनुसन्धान गरिरहेको छ । यो प्रकरणमा मुख्य अभियुक्त भनिएका गोरेसहित उच्च प्रहरी अधिकारी दिवेश लोहनी, श्याम खत्री,  विकासराज खनाल, संञ्जय राउत लगायतका ३१ जना पूर्पक्षका लागि थुनामा छन् । सुन लगानीकर्ता एमके अग्रवालसहित २९ जना अझै फरार सूचीमा छन् । तर गत माघ ९ गते युएई हुँदै त्रिभुवन विमानस्थलबाट बाहिरिएको भनिएको साढे ३३ किलो सुन कहाँ छ त ? यो चासोको विषय बनेको छ । 

साढे ३३ किलो सुन भेट्टिन्छः अनुसन्धान टोली
 

गत माघ ९ गते भित्रिएको भनिएको साढे ३३ किलो सुन भेटिनेमा अनुसन्धान टोली विश्वस्त देखिन्छ । सुन तस्करीमा संग्लन व्यक्तिहरु समातिँदा पनि सुन किन समातिएन त भन्ने बाह्रखरीको प्रश्नमा टोलीका एक सदस्य भन्छन्, “सुन बेचिएको, पगालिसकेको छैन । हामीले गरेको अनुसन्धानमा सुन अहिलेसम्म पनि काठमाडौंमै छ । सुन ढिलो चाँडो फेला पर्नेमा हामी विश्वस्त छौं ।”

सुन लुकाइएको सम्भावित स्थान र व्यक्तिका बारेमा अहिले अनुसन्धान जारी रहेको ती सदस्यले बताए । टोलीले विभिन्न कोणबाट खोजी र अनुसन्धान गरिरहेको बताउँदै ती सदस्यले भने, “अब सुन लुकाउने समूहले सुन बेच्ने अवस्था छैन । हामी निकै नजिक छौं ।”
टोलीले गोरेकै समूहले विभिन्न समयका ३८ क्वीन्टल सुन तस्करी गरेको निष्कर्ष निकालेको थियो ।

उच्च प्रहरी अधिकारी र नेताहरुको पनि पोल खुल्छः टोली

अनुसन्धान टोलीका ती सदस्यका अनुसार ‘ठुला माछा’ भनिएका ठुला नेता र उच्च प्रहरी अधिकारीको संग्लनताको ‘कनेक्सन’ टोलीले केलाइरहेको छ । अभियुक्तहरु थप अनुसन्धान हुने डरले आफैँ अदालतमा उपस्थित भएपछि अनुसन्धान भने थप पेचिलो बनेको ती सदस्यको तर्क छ । उनी भन्छन्, “यो तस्करीको अनुसन्धानको परिणाम राज्यले खोजेको हो । त्यसैले हामी कुन कानुनी बाटोबाट उनीहरुमाथी अनुसन्धान गर्न सकिन्छ त्यो छलफल गरिरहेका छौं ।”

टोलीले उनीहरुमाथी अन्य अभियोग पनि रहेको र कतिपयलाई काठमाडौं ल्याएर मुद्दा चलाउने अवस्था पनि रहेकोबारे तयारी गरिरहेको छ ।

समितिका एक सदस्य भन्छन्, “‘गोरे, श्याम, भुजुङ, छिरीङ, गोविन्द, सञ्जय सबैलाई सँगै राखेर अनुसन्धान गर्दा ‘ठूला माछा’ को नाम सम्भवतः  खुल्छ । त्यतिबेला केही नेता र उच्च प्रहरी अधिकारीको संग्लनता खुल्न सक्ने हाम्रो अनुसन्धानले देखाएको छ ।”

टोलीले सुन तस्करीमा राजनीतिक संग्लनतालाई अस्वीकार गर्न सक्ने अवस्था नरहेको निष्कर्ष निकालेको छ । “यस्तो ठुलो तस्करीमा नेता, सरकारका प्रतिनिधिको संग्लनता छैन भनेर पत्याउन मुस्किल पर्छ,” ती सदस्यले बाह्रखरीसँगको कुराकानीमा भने ।

अन्य अभियुक्त पनि अदालतमा आत्मसर्मपण गर्न सक्छन् : टोली 

अनुसन्धान टोलीले फरार रहेका अन्य अभियुक्तहरु पनि अदालतमा स्वयम् उपस्थित हुनसक्ने आँकलन गरेको छ । आत्मसर्मपण गर्दा विशेष अनुसन्धान टोलीको अनुसन्धानबाट बच्न सकिने भन्दै उनीहरु अदालत उपस्थित हुन सक्ने टोलीको आँकलन छ । यस्तोमा सर्वाधिक खोजीमा रहेका एमके अग्रवाल, गोरेका भाई रमेश उप्रेती लगायत पनि आफैं उपस्थित हुनसक्ने टोलीका सदस्य बताउँछन् । 

भाइबर, फेसबुक र टेलिफोनबाट जानकारी
 

गृह मन्त्रालयमै कार्यालय रहेको अनुसन्धान टोलीले अनुसन्धानका लागि टोली फिल्डमा निरन्तर खटाएको समिति बताउँछ । नयाँ कुरा र तथ्य आउँदा इमो, भाइबर, फेसबुक र टेलिफोनबाट समेत तत्काल जानकारी दिइने गरिएको छ । टोलीले विभिन्न निकायको सहयोग पनि लिइरहेको जनाएको छ ।