काठमाडौं । कपिलवस्तु प्रहरीले पाटेबाघको छालासहित एकजनालाई पक्राउ गरेको छ । पक्राउ पर्नेमा रुपन्देहीको बुटबल उपमहानगरपालिका–५ का ४१ वर्षीय विष्णुप्रसादप्रसाद भट्टराई छन् ।

भट्टराईलाई विशेष सूचनाका आधारमा शिवराज नगरपालिकाको हल्लानगरबाट पक्राउ गरिएको कपिलवस्तुका प्रहरी उपरीक्षक (एसपी) निरञ्जन भट्टले जानकारी दिए ।

बाघको छालालाई किनबेच गर्ने उदेश्यले उनले लु५८प९७५५ नम्बरको मोटरसाइकलमा सेतो प्लाष्टिकको बोराभित्र लुकाएर ल्याएका थिए । प्रहरीका अनुसार छालाको लम्बाइ ६ फिट छ ।

छालाको केही भागमा प्वाल समेत देखिएकाले गोली हानी मारेको आंशका प्रहरीले गरेको छ । थप अनुसन्धानका लागि बाघको छाला र पक्राउ परेका भट्टराईलाई सोमबार डिभिजन वन कार्यालय चन्द्रौटा बुझाइएको एसपी भट्टले जानकारी दिए ।