काठमाडौं । भारतीय प्रधानमन्त्री नरेन्द्र मोदीले यही वैशाख २८ र २९ गते नेपालको भ्रमण गर्दैछन् । मोदीको सुरक्षाका लागि गृह मन्त्रालय तथा चारवटै सुरक्षा निकायले तयारी तीव्र पारेका छन् । गृहमन्त्री रामबहादुर थापाले सुरक्षा व्यवस्था बलियो बनाउन सुरक्षा निकायलाई निर्देशन दिइसकेका छन् । 

थापाले गएको साता जनकपुर पुगेर सुरक्षा व्यवस्थाको जानकारी लिनुका साथै आवश्यक निर्देशन पनि दिएका थिए । मोदी आउने दिन २८ गते प्रदेश नम्बर २ मा सार्वजनिक बिदा दिने निर्णय सरकारले गरिसकेको छ । 

जनकपुर हुँदै काठमाडौं आउने मोदीको सुरक्षाका लागि भ्रमण अवधिभर झण्डै १० हजार सुरक्षाकर्मी परिचालन हुने बताइएको छ । गृह मन्त्रालयका प्रवक्ता रामकृष्ण सुवेदीले विशिष्ट व्यक्तिको सुरक्षा कार्यविधि २०७० अनुसार मोदीको सुरक्षा प्रबन्ध मिलाइएको बताए । सुरक्षामा यति नै संख्यामा सुरक्षाकर्मी परिचालन हुन्छन् भन्न भने नसकिने उनको भनाइ छ । “सुरक्षा संयन्त्र जतिबेला पनि स्टाण्डबाइ भएर बस्ने संगठन हो । कसको सुरक्षा कसरी गर्ने, समन्वय कसरी गर्ने, त्यो सुरक्षा कार्यविधिमा हुन्छ । गृहले त्यही कार्यविधिअनुसार कार्य गरिरहेको छ,” उनले भने । 

गृह मन्त्रालयले नरेन्द्र मोदी भारतबाट ‘इन्डियन एयर फोर्स’को हेलिकोप्टरमा आउने पुष्टि गरेको छ । मोदीलाई हवाई यात्राकै क्रममा दुईवटा हेलिकोप्टरले स्कर्टिङ गर्नेछन् । मोदीसँगै इन्डियन एयरफोर्सको २५ जनाको विशेष कमाण्डो टोली पनि भारतबाटै आउनेछ । 

मोदीलाई पाँच घेराको सुरक्षा
जनकपुर भ्रमणको सबै तयारी र सुरक्षाको बन्दोबस्त २ नम्बर प्रदेश सरकारले गरिरहेको छ । यसका लागि नेपाल प्रहरीका डीआईजी ठूले राई एक सातायता जनकपुरमै छन् । त्यहाँ प्रहरीकोे कमाण्ड राईले गर्नेछन् । मोदीलाई जनकपुरदेखि मुक्तिनाथ हुँदै काठमाडौंसम्म विशेष सुरक्षा व्यवस्था मिलाइएको छ । 

भारतीय सुरक्षाकर्मीसमेत गरेर मोदी पाँच सुरक्षा घेरामा रहनेछन् । मोदीको सुरक्षाका लागि भारतीय प्रहरीको विशेष टोली पनि नेपालमा आइसकेको छ । 

मोदीलाई नेपाल भ्रमणमा सुरक्षाका लागि सबैभन्दा भित्री घेरामा भारतीय सुरक्षाकर्मी नै खटिने बताइएको छ । भारतमा उच्च ओहोदाका व्यक्तित्वको सुरक्षा मामिला हेर्ने डीआईजीको नेतृत्वमा आएको सुरक्षाकर्मीको टिमले मोदीको भ्रमणका बेला अपनाइने सुरक्षा घेराको स्केच तयार पारेको बताइएको छ । नेपाल र भारतीय सुरक्षा अधिकारीको सल्लाहमा स्केच गोप्य राखिएको छ । 

मोदी पुग्ने जनकपुरस्थित रंगभूमि मैदान र जानकी मन्दिरमा पनि विशेष निगरानी बढाइएको छ ।  मोदीको दोस्रो सुरक्षा घेरामा नेपाली सेनाको विशेष टोली परिचालन हुनेछ । नेपाल अवतरण भइसकेपछि सादा पोसाकमा रहने नेपाली सेनाको टोलीले नै मोदीलाई स्कर्टिङ गर्नेछ । 

तेस्रो घेरामा नेपाली सेनासँगै नेपाल प्रहरीको विशेष टोली खटीनेछ । चौथो घेरामा सशस्त्र प्रहरी बलको टोली र पाँचौं घेरामा राष्ट्रिय अनुसन्धान विभागको टोली हुनेछ । 

मोदीको कार्गेडमा पनि नेपाल प्रहरी नै हुनेछ भने भ्रमण अवधिभर सडक क्लियर गर्ने जिम्मा नेपाल प्रहरीको हुनेछ । यसका लागि प्रहरीले तालिमप्राप्त कुकुरको समेत प्रयोग गर्नेछ । गृह मन्त्रालयका अनुसार भ्रमण अवधिमा सीमा क्षेत्रका नाकाहरु पूर्णरुपमा बन्द हुनेछन् । 

जनकपुरबाट काठमाडौं आएपछि मोदी मुक्तिनाथ भारतीय हेलिकप्टरमै जानेछन् या नेपाली सेनाको हेलिकोप्टरमा जान्छन् भन्ने यकिन भइसकेको छैन । 

उता, भारतीय प्रधानमन्त्री मोदीको आसन्न मुक्तिनाथ भ्रमणलाई लक्षित गरेर मुस्ताङमा उच्च सुरक्षा सतर्कता अपनाइएको छ । 

राससका अनुसार तिब्बती सीमामा रहेको नेचुङ र म्याग्दीसँगको सिमाना घाँसासम्ममा जाँचमा कडाइ गरिएको हो । मुस्ताङका होटल तथा लजमा बस्ने पाहुनाहरुको व्यक्तिगत विवरणसहितको अभिलेख पनि संकलन गरिएको छ । 

सुरक्षा निकायले दैनिक बैठक बसेर तयारीलाई तीव्रता दिइएको प्रहरी नायब उपरीक्षक रामहरि पाण्डेले बताए । वैशाख २८ गते मोदीले गर्ने मुक्तिनाथ भ्रमणका लागि तीन दिनसम्म अन्नपूर्ण चक्रिय पदमार्ग बन्द गर्ने विषयमा पनि छलफल चलेको छ । 

मुस्ताङलाई राष्ट्रिय राजमार्गसँग जोड्ने बेनी जोमसोम सडक तीन दिनका लागि खुल्ला गरिने भएको छ । हाल दैनिक आठ घण्टा सवारीसाधन रोकेर स्तरोन्नतिको काम भइरहेको छ । भारतीय प्रधानमन्त्रीको स्वागतका लागि जिल्ला समन्वय समितिका प्रमुख छिरिङल्हमो गुरुङको संयोजकत्वमा स्वागत समिति गठन गरिएको छ । 

हिन्दू तथा बौद्ध धर्मावलम्बीहरुको साझा तीर्थस्थल मानिने मुक्तिनाथमा हुन लागेको उच्चस्तरीय धार्मिक भ्रमणले मुस्ताङवासीमा उत्साह छाएको र यहाँको धार्मिक पर्यटनको विकासमा मद्दत पुग्ने प्रतिनिधिसभा सदस्य प्रेमप्रसाद तुलाचनले बताए । 

यसैबीच रक्षामन्त्री ईश्वर पोखरेलको टोलीले सुरक्षा अधिकारी र जनप्रतिनिधिसँग भारतीय प्रधानमन्त्री मोदीको भ्रमणको तयारीबारे जानकारी लिएको थियो । 

सो अवसरमा उनले मुस्ताङस्थित कोरला नाका खुलाउन सरकारले उच्च प्राथमिकता दिएको बताए । जोमसोममा नेकपा एमालेका कार्यकर्तासँगको भेटघाटका क्रममा मन्त्री पोखरेलले पहुँचमार्ग निर्माण, सुरक्षा क्याम्प राख्नका लागि द्वैपक्षीय छलफल अघि बढेकाले अबको दुई तीन वर्षमा कोरला नाका सञ्चालनमा आउने बताए ।