काठमाडौं । नेकपा एमाले र माओवादी केन्द्रबीचको पार्टी एकता संयोजन समितिको बैठक आज (बुधबार) साँझ बस्ने भएको छ । माओवादी केन्द्रका वरिष्ठ नेता एवं एकता संयोजन समितिका सदस्य नारायणकाजी श्रेष्ठले साँझ ५ बजे प्रधानमन्त्री निवास बालुवाटारमा बैठक बसेर सहमति हुन बाँकी रहेका विषयहहरु टुंग्याउने बताए । “आज बैठक बसेर सहमति हुन बाँकी रहेका विषयहरु टुङ्गो लगाउने कोसिस गर्छौं । सबै विषयहरुमा लगभग सहमति जुटिसकेको छ,” श्रेष्ठले बाह्रखरीसँग भने ।

एमाले र माओवादी केन्द्रबीच एकीकृत पार्टीको चुनाव चिन्ह, जनुयद्ध र पार्टीमा रहने सदस्यहरुको संख्याबारे सहमति जुट्न बाँकी छ । यही चैत २० गते विधान तथा राजनीतिक मस्यौदा कार्यदलले पार्टी एकता संयोजन समितिका सदस्यहरुलाई प्रारम्भिक विधान एवं प्रतिवेदन बुझाएका थिए ।

वैशाख ९ मा पार्टी एकता नहुनसक्छ माओवादी नेता
एमाले र माओवादी केन्द्रका शीर्ष नेताहरुले वैशाख ९ गते पार्टी एकता गर्ने बताए पनि माओवादी नेताहरु भने अझै सशंकित छन् । प्रधानमन्त्री केपी शर्मा ओलीले एकलौटी रुपमा सचिव सरुवा गरेपछि केही दिनयता माओवादी नेताहरु सरकारसँग असन्तुष्ट छन् ।

माओवादी केन्द्रका नेता मणि थापाले सरकारले एकलौटी तरिकाले निर्णय गर्न थालेकाले वैशाख ९ गते पार्टी एकता नहुन सक्ने बताए । “पार्टी नै एकता हुँदैछ भनेपछि सचिव सरुवा गर्दा मन्त्रीहरुलाई त प्रधानमन्त्रीले सोध्नुपर्छ । यो तरिकाले पार्टी एकतामा ठेस पुग्छ,” नेता थापाले भने, “सरकारको कामकारवाही देखेर माओवादी सशंकित भएको छ । वैशाख ९ गते पार्टी एकता नहुनसक्छ ।”

संगठन भागवन्डामा एमालेले चुनावमा जसरी गर्न खोजेको आरोप पनि थापाले लगाए । “अहिले एमाले र माओवादीबीच एकीकृत पार्टीको चुनाव चिन्ह, जनुयुद्ध र एकीकृत पार्टीको केन्द्रीय समितिमा कुन पार्टीको कति संख्या हुने भन्नेमा सहमति जुट्न सकेको छैन । एमालेले चुनाव र सरकार गठनमा भागवन्डा भएजसरी पार्टी एकतामा पनि गर्दैछ,” थापाले भने ।

एमाले नेता भन्छन्– अहिले जनयुद्धलाई गालामा लगाउँदा पनि नरम हुन्छ
एमालेका नेता भने पार्टी एकतामा कुनै समस्या नरहेको दाबी गर्छन् । अहिले विवादित भनिएका विषयहरु छलफल गर्न बाँकी नै रहेको दावी एमालेको छ । 

एमाले नेता सुरेन्द्र पाण्डेले एमालेले जनयुद्ध स्वीकार गर्दा केही नबिग्रने बताए । “अहिले बाहिर विवादित भनिएका विषयहरु छलफल गर्न बाँकी छ । जनयुद्ध स्वीकार गर्दा के बिग्रन्छ त ? गिरिजाप्रसाद कोइरालाले जनयुद्धमा लागेको मान्छेसँग शान्ति वार्ता गरेको होइन र ? नस्वीकार्ने प्रश्नै भएन । जनयुद्धले हिजो पोल्थ्यो, अहिले गालामा लगाउँदा पनि नरम हुन्छ । हिजोको कुराबाट कोही डराउनु पर्दैन । त्यो एउटा इतिहास हो,” पाण्डेले भने । सहमति हुन बाँकी रहेका विषयहरु आफूहरुले छिट्टै टुङ्ग्याउने दावीसमेत उनले गरे ।