काठमाडौं । डा. बाबुराम भट्टराई नेतृत्वको नयाँ शक्ति पार्टी नेपालले आफ्ना मतदातामाझ वैकल्पिक शक्तिको अर्थ बुझाउन अभियान चलाउने भएको छ । पार्टीले केन्द्रीय नेताहरुलाई फिल्डमा खटाउने योजनासमेत तयार पारेको छ । 

गत साउन ८ गते नयाँ शक्ति प्रचार विभाग प्रमुख विश्वदीप पाण्डेको नेतृत्वमा सात वटा प्रदेशमा प्रचार विभाग टोली पुगेपछि पार्टीले आफ्ना मतदातामाझ वैकल्पिक शक्तिको अर्थ र औचित्य बुझाउने योजना बनाउन लागेको हो । 

प्रचार विभाग टोली साउन ८ गतेदेखि १५ गतेसम्म ७ प्रदेशको भ्रमणमा गएको थियो । भ्रमणको क्रममा प्रचार विभागको टोलीले जनताको गुनासो सुन्ने काम गरेको थियो । टोलीलाई ७ वटै प्रदेशका शुभचिन्तकले पार्टी नेतृत्वलाई फिल्डमा आउन आग्रह गरेका थिए ।

प्रदेश भ्रमणपछि पार्टीेले वैकल्पिक शक्तिको अर्थ र भावी कार्ययोजनाको बारेमा जनतामा बुझाउन लागिएको प्रचार विभाग प्रमुख पाण्डेले जानकारी दिए । “हामी भर्खरै सात वटै प्रदेश भ्रमण गरेर आयौं । भ्रमणको क्रममा जनताले हामीलाई कांग्रेस र नेकपा भन्दा तिमीहरु फरक केमा छौं ? किन भोट दिने ? जस्ता प्रश्न गरेका थिए । त्यसबाट हामीले कार्यकताले वैकल्पिक शक्तिको अर्थ बुझे पनि जनताले नबुझेको पायौं । पार्टीको बारेमा छरिएका भ्रम पनि चिर्न बाँकी रहेछ । त्यसैले वैचारिक हिसाबले भन्दापनि नेताहरु जनताको घरघरमा गएर वैकल्पिक शक्तिको अर्थ बुझाउने योजना बनाउँदैछौं,” पाण्डेले भने ।

पार्टी संयोजक भट्टराई स्वदेश फिर्ता भएपछि आफूहरुको कार्यक्रम तीव्र रुपमा अगाडि बढ्ने उनले बताए । “केन्द्रीय कार्यकारीको बैठक बसेर हामी कसरी अगाडि बढ्ने भन्ने विशेष योजना बनाउँदैछौं,” पाण्डेले भने ।

नयाँ शक्ति पार्टी नेपालका केन्द्रीय सदस्य गंगा श्रेष्ठले पनि पार्टीलाई रुपान्तरण गरेर अघि बढ्नुपर्ने समय आएको बताए । “जनताले विकल्प खोजिरहेका छन् । जनता हामीप्रति निकै आशावादी छन्, हामीबाट धेरै आशा गरेका छन्,” श्रेष्ठले भने, “हाम्रो पार्टीका नेताहरु काठमाडौंमा मात्र सीमित भएर बस्नुभएको छ । अब त्यसरी बस्नु हुँदैन भन्ने अवस्थामा हामी पुगेका छौं । जनताले आफ्नो नेता आफ्नो ठाउँमा आएर समस्या सुनिदियोस् भनिरहेका छन् । त्यसैले अब हामी नयाँ तरिकाले अघि बढ्दैछौं ।”

नेता श्रेष्ठले पार्टीले कार्यक्रम बनाएर वैकल्पिक शक्तिको अर्थ बुझाउने गरी जनताको बीचमा जाने तयारी भइरहेको जानकारी दिए । “हामीले पार्टीलाई वैकल्पिक शक्ति त भन्यौं तर, जनतामाझ हाम्रो विचार र भावी कार्ययोजना पुग्न सकेको छैन । जनताले जवर्जस्त विकल्प खोजिरहेका छन्,” उनले भने, “पार्टीले ३ नम्बर बाहेक ६ प्रदेशमा आगामी भदौ १५ गतेभित्रमा प्रदेशस्तरको बैठक सम्पन्न गर्ने योजना बनाएको छ । बैठकपछि विशेष योजना बनाएर आफ्ना भावी कार्ययोजनासहित वैकल्पिक शक्तिको अर्थ बुझाउने गरी पार्टी नेतृत्व जनतामाझ जान्छ ।”

फिल्डमा नजाने र निष्कृय नेतालाई पार्टीले कारबाही गर्ने तयारी गरेको पनि बताइएको छ । पर्शुराम खापुङको संयोजकत्वमा अनुगमन तथा मूल्यांकन विभागसमेत गठन गरिएको छ । “फिल्डमा जाने र नजाने नेताहरुको मूल्यांकन त्यसले गर्छ । नेताहरु फिल्डमा जानुभएन भने पार्टीले जिम्मेवारीबाट हटाउने लगायतको कारबाही गर्छ,” विभागका एक सदस्यले भने ।