कैलाली । स्वास्थ्य तथा जनसंख्यामन्त्री प्रदीप पौडेलले स्वास्थ्यको मापदण्ड सरकारी र निजी दुवैतिर एउटै हुनुपर्ने भन्दै आफू त्यसकै निम्ति काम गरिरहेको बताएका छन् । कांग्रेस सरकारमा रहने कुराभन्दा सरकारमा बसेर नागरिकका निम्ति काम गर्नु महत्त्वपूर्ण भएको उनले बताए । 

आज मंगलबार धनगढीमा आयोजित एक कार्यक्रममा उनले स्वास्थ्य संस्था शय्याको आधारमा वर्गीकरण नहुने, सेवाको आधारमा वर्गीकरण हुने बताए । 

त्यसैले आफूले तहगत अस्पतालको विभाजन गर्ने प्रक्रिया सुरु गरेको उनले बताए ।‘‘एउटा विशिष्टीकृत सेवा दिने र अर्को आधारभूत प्राथमिक सेवा दिने अस्पतालका रूपमा विकास हुन आवश्यक छ” मन्त्री पौडेलले भने, “आधारभूत अस्पतलाले निःशुल्क उपचार गरेको हुनुपर्ने र विशिष्टीकृत अस्पतालले नसक्नेलाई निःशुल्क सेवा र सक्नेलाई यथोचित मूल्य लिएर उपचार प्रदान गर्ने हुनुपर्छ ।’’ 

उनले सातै प्रदेशमा क्यान्सर रोगको उपचार सेवा विस्तार गरेको  र सबै प्रदेशमा मुटु रोगको उपचार सेवा विस्तार गर्ने योजना बनाइरहेको बताए । 

सुदूरपश्चिम प्रदेशका सबै अस्पतालमा सिकलसेल एनिमियाको औषधि निःशुल्क उपलब्ध गराउने गरी प्रक्रिया अगाडि बढेको मन्त्री पौडेलको भनाइ छ । “यसका लागि मित्रराष्ट्र भारतको सहयोग हुने गरी करिब कुरा टुंगिएको छ, अब सम्झौताका लागि पहल भइरहेको छ,” उनले भने । 

पार्टी र पार्टीको प्रतिनिधित्व गरेका हरेक स्थानमा परिणाममुखी काम गरेको महसुस गराउने गरी अगाडि बढ्नुपर्नेमा जोड दिए । मन्त्री पौडेलले आमनागरिक र सुशासनसँग सम्बन्धित विषयमा केन्द्रित भएर काम गर्न पार्टीका नेता तथा कार्यकर्तालाई आग्रह गरे ।रासस