काठमाडौं । विवेकशील र साझा पार्टीबीच एकता भएको एकवर्ष पूरा भएको अवसरमा विवेकशील साझा पार्टीले अहिले विभिन्न कार्यक्रम गर्दै आएको छ । त्यसै अवसरमा विवेकशील साझा पार्टीले जिल्ला संयोजक पनि तोकेर संगठन विस्तारको काम जारी राखेको छ ।
शनिबार काठमाडौंमा प्रदेश नम्बर तीनका ६ वटा जिल्लाका संयोजक तोक्ने कार्यक्रम तय गरिएको थियो ।

पार्टीले प्रदेश नम्बर ३ की संयोजक समीक्षा सापकोटालाई जिल्ला संयोजक तोक्न सक्ने अधिकार दिइएको भए पनि जिल्ला संयोजक तोक्ने क्रममा विवाद देखियो । शनिबार काठमाडौंमा भएको उक्त कार्यक्रममा असन्तुष्ट समूहले होहल्ला गर्दै कार्यक्रममा नेतृत्वविरुद्ध नाराबाजी नै गरेको थियो ।

कार्यक्रममा आफ्ना धारणा राख्दै सुजन श्रेष्ठले जिल्ला संयोजक माथिबाट नभइ तलबाट तोकिनुपर्ने बताएका थिए । तर नेतृत्वले संयोजकमा अधिकार रहेको भन्दै जिल्ला संयोजक चयन गरेपछि होहल्ला र नाराबाजी भएको थियो ।

“उहाँहरुको असन्तुष्टिका बारेमा अघिल्लै दिनमा पनि छलफल भएको थियो,” विवेकशील साझाका एक नेताले भने, “शनिबार पनि बोल्न दिने की नदिने भन्ने विषयमा छलफल भएको थियो । लोकतन्त्रमा कसैले अभिव्यक्ति दिन खोज्दा रोक्नुहुँदैन भनेर दिइएको थियो । तर त्यहाँ बबन्डर गर्ने प्रयास गरियो ।”

शनिबार काठमाडौंमा भएको घटनालाई दुर्घटनाको रुपमा लिँदै त्यससँग सम्बन्धित व्यक्तिहरुलाई कारवाही थाल्ने तयारी गरेको विवेकशील साझाले जनाएको छ ।  

“महाविशेनसम्मको समयलाई पार्टीले संक्रमणकाल भनेको छ,” विवेकशील साझाका प्रवक्ता डा. सूर्यराज आचार्यले बाह्रखरीसँग कुरा गर्दै भने, “संक्रमणकालको समयमा पार्टीको निर्देशिकाअनुसार हामी अघि बढेका छौं । जिल्ला संयोजक प्रदेश संयोजकले केन्द्रको समन्वयमा र प्रदेश संयोजक केन्द्रले तोक्ने हो । त्यहीअनुसार तोकिएको छ ।”

“विधानमा हामीले नगरपालिका, गाउँपालिका र वडासम्मको नेतृत्व त्यहीँभित्रको व्यक्तिले चुन्ने व्यवस्था गरेका छौं,” उनले भने, “त्यसका लागि सदस्य हुनुपर्छ । सबैभन्दा पहिला केन्द्रीय समिति, प्रदेश र जिल्ला संयोजक छानिनुपर्छ । विधानमा नै हामीले प्रदेश र जिल्ला संयोजक केन्द्रले छान्ने भनेका छौं । केन्द्रको परामर्शमा सबै जिल्ला मातहतको जिल्ला संयोजक छान्ने हो । त्यसैले हामी पार्टीको विधानअनुसार नै गएका छौं । यसमा विवाद गर्नुपर्ने कुनै कुरै छैन ।” 

प्रवक्ता आचार्यले कार्यक्रम बिथोल्ने युवाको समूहलाई पार्टीले कारवाहीको प्रक्रिया अघि बढाएको जानकारी समेत दिए ।

“कार्यक्रम बिथोल्नेहरुलाई कडाभन्दा कडा कारबाही गर्छौं,” उनले भने, “केन्द्रीय कार्यालयमा ती साथीहरुलाई हाम्रो संयोजक रवीन्द्र मिश्र र किशोर थापाले शुक्रबार नै भेटेर पार्टीको प्रक्रियाबारे बुझाउनुभएकोे थियो । तर, पनि हिजो विरोध गर्नुभयो,उदण्डता मच्चाउनुभयो ।”
उनले त्यहाँ रहेका कतिपय व्यक्तिहरु विवेकशील साझाका सदस्य पनि नभएको बताए ।

“कार्यक्रम बिथोल्न कुन–कुन तहका कुन जिम्मेवारी लिएका मान्छेहरु लागेका छन् । हामी कारबाहीको प्रक्रियामा छौं,” उनले भने । उनले पार्टीको केन्द्रीय नेतृत्वले छानेका व्यक्तिहरु भन्दा राम्रो व्यक्ति ल्याउन कार्यक्रम बिथोल्न खोज्ने  युवाहरुलाई चुनौती समेत दिए ।

“महाविधेशन अगाडि मलाई प्रवक्ता रवीन्द्र मिश्रले बनाएको हो,” उनले थपे, “चितवनको मान्छेले छानेर बनाएको होइन । संक्रमणकालमा यसरी नै हो पार्टी बन्ने हो । संक्रमणकालमा हामीले धेरै सम्झौता गरेर जिल्ला र प्रदेश संयोजक छानेका छौं ।”

अहिले कुनै गुट छैन 
 

तत्कालीन विवेकशील र साझा पार्टी मिलेर विवेकशील साझा पार्टी बनेको हो । पार्टी प्रवक्ता आचार्यले पार्टीभित्र अहिले त्यस सम्बन्धमा कुनै गुट नभएको स्पष्ट पारे ।

“खासगरी दुईवटा पार्टी मिलेर बनेको हुनाले गुटभन्दा पनि पार्टीलाई कसरी लैजाने भन्नेमा स्कुलिङ फरक हुन सक्ला तर हामी विचारमा गलत छैनौं,” प्रवक्ता आचार्यले भने, “हामीले झगडा गर्ने विचार र एजेन्डामा हो । मुलुकलाई यसरी राम्रो बनाउन सकिन्छ भन्ने कुरामा हो, पदको लागि झगडा गर्ने हाम्रो समय होइन ।”

प्रवक्ता आचार्यले पार्टी निर्माणको संरचना आफ्ना सदस्यहरुलाई बुझाउन नसकेको स्वीकार पनि गरे । “केन्द्रले प्रक्रियागत नै निर्णय गर्ने हो । हामीले साथीहरुलाई पार्टी निर्माणको प्रकृया बझाउन सकेनौं होला,” उनले भने, “कति साथीहरुलाई यो पार्टी बनिसक्यो, हामीले पसिना बगाउने हामीलाई नै संयोजक नबनाउने ? भन्ने पनि होला । हामीले साथीहरुलाई तपाईंहरुको र पार्टीको भावना प्रतिबिम्बित नहुने गरी निर्णय भयो भने सधैँ खबरदारी गर्नुहोस् हामी सच्चिन्छौँ भनेकै छौं ।”

उनले शनिबार होहल्ला गर्ने केहीले पार्टीको प्रक्रिया बुझ्न नसकेको बताए ।