काठमाडौं । पार्टी स्थापनाकालदेखि नै वैकल्पिक शक्तिको रुपमा नयाँ शक्ति पार्टी नेपाल र विवेकशील साझा पार्टीले आफूहरुलाई दाबी  गर्दै आएका छन् । तर प्रतिनिधिसभा र प्रदेशसभा निर्वाचनमा सोचेअनुसारको मत भने प्राप्त हुन सकेन ।

चुनावपछि के गर्दैछन् त विवेकशील साझा र नयाँ शक्ति ?

नयाँ शक्तिले संगठन विस्तार र सुदृढिकरणको लागि पाँचवर्ष र पाँच "स" लाई अघि सारेको छ । पार्टीले संगठन निर्माण, विस्तार र संगठनको सुदृढिकरणको लागि २ वर्ष छुट्याएको  छ ।  यसलाई पार्टीले महाधिवेशन वर्ष समेत भनेको छ भने बाँकी पाँच वर्षमध्ये ३ वर्ष आगामी निर्वाचनको लागि खर्चिने तयारी गरेको छ ।
नयाँ शक्तिले सातवटै प्रदेशमा संयोजक र इन्चार्ज तोकिसकेको छ । हालसालै  सातवटै प्रदेशको बैठक र प्रशिक्षणात्मक कार्यक्रम सम्पन्न गरेको थियो । अहिले जिल्ला-जिल्लाको बैठकहरु सम्पन्न गर्दैछ । सबै जिल्लाको बैठकहरु यसै महिनासम्म सम्पन्न गर्ने बताएको छ । वैशाख १५ सम्ममा गाउँपालिका, नगरपालिका उपमहानगरपालिका र महानगरपालिकाको बैठकहरु पनि सम्पन्न गरिसक्ने नयाँ शक्ति पार्टीको योजना छ ।
त्यस्तै विवेकशील साझा पार्टी पनि अहिले संगठन विस्तारमा नै व्यस्त छ । पार्टीले अहिले सात प्रदेशमध्ये तीनवटा प्रदेशमा संयोजक तोकेको छ । प्रदेश नम्बर पाँचमा अनुपमान सैँजु, ६ मा  गेहेन्द्र दाहाल र ७ मा  गोपाल हमाल रहेका छन् ।

म्याग्नेटिभ सेन्टर बनाउँदै नयाँ शक्ति

नयाँ शक्तिले आत्म समीक्षा गर्दै आफूलाई बलियो केन्द्रको रुपमा स्थापित गर्ने तयारी गरेको छ । पार्टीका केन्द्रीय सदस्य एवं प्रवक्ता गंगा श्रेष्ठले भने, "पार्टीले म्याग्नेटिभ सेन्टर बनाउँदैछ । नयाँ शक्ति कुनै पनि पार्टीसँग एकता गर्न नजाने तरिकाले म्याग्नेटिभ सेन्टर  बताउँदैछ । हामी म्याग्नेट हुन चाहन्छौं, ताकि फलामका टुक्राहरु हामीतर्फ आकर्षित भएर आउँछन्। विगतमा हामी आफै एउटा फलामको टुक्रा जस्तो भयौं, अब हुँदैनौं । म्याग्नेट हुनको लागि पार्टीको निर्माण, विस्तार र सुदृणीकरण गर्दैछौँ । त्यसको लागि हामीले २०७५ लागि महाधिवेशन वर्ष भनेर नामाकरण समेत गरिसकेका छौं ।" 

नयाँ शक्तिले असोज महिनासम्ममा स्थानीय तहको सबै सम्मेलन सम्पन्न गर्ने, मंसिरभित्रमा प्रदेशको अभिवेशन सम्पन्न गर्ने र आगामी फागुन १० गतेदेखि १५ गतेसम्म पार्टीको प्रथम महाधिवेशन सम्पन्न गर्ने तयारी गरेको छ ।

होला त नयाँ शक्ति  र साझाको एकता ?

नयाँ शक्ति र विवेकशील साझा पार्टीबीच पार्टी एकताको हल्ला बेला बेलामा चल्ने गरेको छ ।  तर उनीहरू भने अझै नजिक आइसकेका छैनन् । दुई पार्टीबीच समानुपातिक, समावेशी, सहभागीता मुलुक लोकतन्त्रको मुद्दा हेर्ने दृष्टिकोण भने फरक छ ।

"नयाँ शक्ति र विवेकशील पार्टीबीच तत्काल मिल्ने एउटा मात्र सदाचार सुसासनको मुद्दा हो," नयाँ शक्ति पार्टीका प्रवक्ता गंगा श्रेष्ठ भन्छन्, "दुई पार्टीबीच समानुपातिक, समावेशी, सहभागीता मुलुक लोकतन्त्रको मुद्दा भने दुई पार्टीबीच मिल्दैन । नयाँ शक्तिले उठाएको समानुपातिक, समावेशी र सहभागीता मुलुक लोकतन्त्रको मुद्दालाई विवेकशील साझा पार्टीले जातीय मुद्दाको रुपमा बुझेको छ ।" 

विवेकशील साझा पार्टीका प्रवक्ता डा.सूर्यराज आचार्यले पनि नयाँ शक्तिसँग आफूहरुको तत्काल एकता सम्भव नभएको बताए । उनले नयाँ शक्तिको विचार कार्यशैली र रणनीतिमा परिवर्तन आएमा मात्र एकता गर्न सकिने विचार व्यक्त समेत अघि सारे ।

"नयाँ शक्तिको उत्साह हराइसक्यो," उनले भने, "हाम्रो केन्द्रीय समितिको संगठन बाहेक चुनावमा होमियौं । नयाँ शक्तिको ७५ जिल्लामा संगठन थियो तर पनि हामी भन्दा पछाडि हुनुभयो । विद्यार्थी, शिक्षक र वकिलको संगठन बनाएर उहाँहरु पुरानै राजनीति गर्दै हुनुहुन्छ । जातीयताको कुरा उहाँहरुले बुझ्नुभएकै छैन । जातीयता र पहिचानको कुरालाई राज्यले नै सम्बोधन गर्नुपर्छ । ताकि राज्य र समाजमा हरेक नागरिकले उत्तिकै गर्व गर्न सकोस् । जातीयतालाई उहाँहरु राजनीतिकरण गर्दैहुनुहुन्छ ।"
उनले  डा. बाबुराम भट्टराई नै भन्ने गरेको  नेपाल बहुराष्टप्रति नै आपत्ति जनाए । "नेपाल बहुराष्ट्रिय होइन । बहुराष्ट्रको अर्कै अर्थ छ । त्यस्ता कुराहरु ल्याएर नेपालको राजनीतिमा गिजोल्ने होइन । जनताले खोजेको जीवन स्तर सम्बोधन गर्नुपर्‍यो । हरेक जातजाती भाषाभाषीले एउटा स्वभिमान साथ म नेपाली हुँ भन्ने अनुभूति दिनको लागि राजनीतिकरण गरेर हुँदैन । त्यसैले उहाँहरुसँग तत्काल एकता संभव छैन," उनले भने ।

नयाँ शक्तिकै नेता तान्ने विवेकशील साझा पार्टीको दाउ

विवेकशील साझा पार्टीले नयाँ शक्तिका केही नेताहरू नै नयाँ शक्तिको दस्तावेजभन्दा आफूहरुको दस्तावेजसँग धेरै नजिक रहको दावी गरेको छ । त्यसैले उनीहरू आफ्नो पार्टीमा आउन सक्ने आँकलन विवेकशीलको छ ।

नयाँ बन्ने प्रस्तिपर्धा

दुई पार्टीले स्थापनाकालदेखि नै आफूहरुलाई छुट्टै नयाँ सोच, विचार, शैली र रणनीति भएको पार्टीको रुपमा परिचित गराउन चाहन्छन् । उनीहरुले पार्टी एकताको लागि एकअर्कोको विचार, कार्यशैली र रणनीति नयाँ हुनुपर्ने बताएका छन् ।  

नयाँ शक्तिका नेताहरुले पनि दुई वटै पार्टीलाई वैकल्पिक शक्तिको रुपमा जनताले आशा गरेको बताउँदै नयाँ ढंगले सोचेर विवकेशील साझा पार्टी अगाडि बढ्नुपर्ने बताउँदै आएका छन् । "नेपाली जनताले हामीलाई वैकल्पिक शक्तिको रुपमा आशा गरेका छन्, "नयाँ शक्तिका एक नेताले भने, "त्यसैले उहाँहरु पनि हामी जस्तै नयाँ बन्नुपर्‍यो । विचार कार्यशैलीमा हामी स्पष्ट छौं । पार्टी एकताको लागि विचार, कार्यशैली र रणनीतिमा नजिक हुनुपर्‍यो । वैकल्पिक शक्ति मात्र भनेर नजिक भइँदैन ।" 

विवेकशील साझाका केन्द्रीय सदस्य मिलन पाण्डे भन्छन्,  "हामी के कुरामा स्पष्ट छौं भने हाम्रो पार्टीको कुनै एउटा एजेन्डा हामीले लुकाएका छैनौं । हामी कतैबाट सञ्चालित, कसैको एजेन्डा बोक्नुपर्ने बाध्यता हामीलाई छैन । हामी खुला किताब जस्तै छौं ।"