काठमाडौं । व्यवसायी पवन सांघाइलाई अपहरण गरी ८० लाख फिरौती मागेको अभियोगमा तीनवर्ष जेल बसेर अघिल्लो साउनमा छुटेका पुर्वमन्त्री श्यामसुन्दर गुप्ता फेरि पक्राउ परेका छन् । काठमाडौंको डिल्लीबजारबाट सांघाइलाई अपहरण गरी भारतीय भूमिमा पुर्याएर गुप्ताले फिरौती मागेका थिए । गुप्ताले ललितपुरकी एक महिला व्यवसायीलाई धम्क्याएर ५० लाख माग गरेको ललितपुर प्रहरी प्रमुख एसएसपी पिताम्बर अधिकारीले जानकारी दिए । उनले ती महिलालाई बारम्बार टेलिफोनमार्फत रकम नदिए अपरहण गरी बेपत्ता बनाईदिने धम्की दिने गरेको प्रहरीले जनाएको छ । ललितपुर प्रहरी प्रवक्ता डीएसपी इश्वर कार्कीले बाहखरीसँग भने,“पुर्वमन्त्री गुप्ताले बारम्बार टेलिफोनमार्फत रकम माग गरेको खुलेको छ । उनले ५० लाख मागेका रहेछन् । त्यो रकम नदिए जे पनि हुन सक्छ भन्दै धम्क्याएको तथ्य फेला परेपछि हामीले फक्राउ गरी अनुसन्धान अघि बढाएका छौं ।” प्रहरीले पीडित व्यवसायी महिलाको नाम भने गोप्य राखेको छ । उजुरीका आधारमा सोमबार दिउसो ललितपुरको ताछिखेलस्थित घरमा रहेका बेला पुर्वमन्त्री गुप्तालाई पक्राउ गरिएको थियो । पक्राउ परेका गुप्तालाई अपहरण तथा शरीर बन्धक अभियोगमा अदालतबाट चार दिनको म्याद लिएर अनुसन्धानका लागि हिरासतमा राखिएको उनले जनाए । तीनवर्षको जेल बसाई पछि रिहा भएका गुप्ताले सदभावना पार्टी यूनाइटेड दल गठन समेत गरेका थिए ।