धनगढी । धनगढीलाई ७ नम्बर प्रदेशको अस्थायी राजधानी तोकिएसँगै प्रदेश प्रमुखको कार्यालय, निवास, प्रदेश सभा बैठक र प्रदेश सासंदहरुलाई सपथ ग्रहणका लागी भवनको टुङ्गो लगाईएको छ ।

धनगढीको जिल्ला प्रशासन कार्यालयमा बसको प्रदेश कार्यालय व्यवस्थापन समितिको बैठकले ती स्थानहरुको टुङ्गो लगाएको हो । क्षेत्रीय प्रशासक लक्ष्मीराम पौडल, उप–प्रशासक शंकरबहादुर विष्ट, जिल्ला प्रशसनका प्रतिनिधि, शहरी विकास तथा भवन डिभिजन कार्यालयका प्रमुखको टोलीले २ दिन प्रदेश प्रमुखको कार्यालय र निवासको लागी एक दर्जन बढि कार्यालयको निरीक्षणपछि निर्णय गरिएको हो । 

धनगढी उप–महानगरपालिका वडा नम्वर ४ मा रहेको घरेलु तथा साना उद्योग कार्यालयमा प्रदेश प्रमुखको सचिवालय र बनदेवी मन्दिरसँगै जोडिएको क्षेत्रीय वन निर्देशनालयमा निवास राख्ने निर्णय गरिएको हो । यस्तै प्रदेश सभाको वैठक राख्नका लागि जिल्ला समन्वय समितिको सभाहललाई टुङ्गो लगाईएको छ । 

प्रदेश सभा सदस्यलाई सपथ ग्रहणका लागि सरकारी कार्यालयमा संभव नदेखिएपछि शुभश्री पार्टी प्यालेसमा सपथ ग्रहण कार्यक्रम राख्ने निर्णय गरिएको क्षेत्रीय प्रशासक लक्ष्मीराम पौडलले वताए । दुई दिन अनुगमन निरीक्षणपछि स्थान टुंगाउने काम भएको हो उनले भने– त्यसका लागि सवै किसिमले उपयुक्त भएका स्थानहरुलाई छनोट गरेका छौं । 

प्रदेश प्रमुखको निवास, सचिवालय, प्रदेश सभा बैठक र प्रदेश सासंदहरुको सपथ ग्रहणका लागी कार्यालयको पहिचान गरिएसँगै आजदेखि नै तयारी थालिएको छ । प्रदेश प्रमुखको सचिवालयमा रङरोगन लगायतका अन्य व्यवस्थापन भईरहेका छन् । यसलगत्तै मुख्यमन्त्री निवास, मन्त्रालयहरु र मन्त्रीहरुको निवासको पनि टुंगो लगाउनुपर्ने हुन्छ ।