काठमाडौं । नेपाल समाजवादी पार्टी (नयाँ शक्ति)का अध्यक्ष बाबुराम भट्टराईले केही पुराना कम्युनिस्ट घटकहरूले मौसमी रूपमा एक ठाउँमा उभिएर आफूलाई समाजवादी मोर्चा भन्ने गरेको बताएका छन् । सामाजिक सञ्जालमा शुक्रबार पोष्ट गर्दै कम्युनिस्ट भन्न लाज लागेको भए र समाजवादी भन्नु उपयुक्त ठानेको भए पार्टीको नाम नै समाजवादी राख्न सुझाव दिए ।

"कम्युनिस्ट भनेर कार्यकर्तालाई ठग्ने, अनि समाजवादी भनेर जनतालाई ठग्ने दोहोरो चाल हो ? यसरी दुईवटा डुंगामा खुट्टा राखेर कता पुगिएला ?," उनले प्रश्न गर्दै भने, यो भयांकर वैचारिक र नैतिक विचलन हो । यसको सट्टा विगतका कम्युनिस्ट आन्दोलनका अनुभव र नयाँ युगको नयाँ आवश्यकता अनुरूप उत्तर–पुँजीवादी र उत्तर–साम्यवादी वैचारिक–राजनीतिक विकल्प खोज्नेतिर लाग्ने हो कि ?"

त्यसका निम्ति सार्थक बहस हेतु नेसपा (नयाँ शक्ति)को हालै सम्पन्न प्रथम महाधिवेशनद्वारा पारित दस्ताबेज नयाँ युगको नयाँ कार्यभार : वैकल्पिक राजनीतिको औचित्य र आधारबाट उद्धृत अंश समुन्नत समाजवादको वैचारिक–राजनीतिक मार्ग निर्देशन समेत उल्लेख गरेका छन् ।