काठमाडौं । बंगलादेशी नागरिक अलिम मोल्लिक एक महिनाअघि इटाली जाने सपना बुनेर काठमाडौं ओर्लिए । बंगलादेशबाट नै इटाली जान सहज नभएपछि उनी ‘एजेन्ट’को पछि लाग्दै अवैध बाटो हुँदै इटाली पुग्ने योजनासहित नेपाल आएका थिए ।

उनलाई नेपाल हुँदै इटाली पठाउने समूहमा बंगलादेशकै नागरिक मुहम्मद फरहिद हुसेन चौधरी, मोहम्मद मोस्ताफिजुर रहमान, अबुयुसुफ एमडी हानिफ, काजी सहत्ताब हुसेन र अजिम मोलिमसहितको समूह थियो ।

उनीहरूकै योजनाअनुसार मोल्लिकसहित १३ जना नेपाल आए । मुहम्मद फरहिद हुसेन चौधरीको समूहले उनीहरूलाई भनेका थिए,‘‘हामी नेपाल हुँदै इटाली र फ्रान्स पठाउन सक्छौँ जान चाहन्छौ भने तीन हजार ५०० अमेरिकी डलर बोकेर नेपाल आउनू ।’’

बंगलादेशमा राम्रो आम्दानी नभएका १३ जना युवा उनीहरू प्रलोभनमा परेर भिजिट भिसामा नेपाल आए । चौधरीसहितको समूहले भनेबमोजिमको तीन हजार ५०० डलरसमेत ल्याए । 

उनीहरूलाई लागेको थियो– तीन हजार ५०० डलर बुझाएपछि सहजै इटाली र फ्रान्स पुगिन्छ । बंगलादेशबाट नेपाल आएकाहरूलाई चौधरीसहितको समूहले गौशालाको होटेल प्राइम स्विटमा राख्यो ।

सोमबार उनीहरू १३ जनालाई नै भिसा प्रक्रियाका लागि होटेलकै सेमिनार हलमा बोलाइयो । अलिम मोल्लिकसहितको समूह भिसा प्रक्रियाका लागि तीन हजार ५०० रुपैयाँसहित त्यहाँ पुगेका थिए ।

चौधरीसहितका ६ एजेन्टले अलिमसहितका १३ जनाले ल्याएको रकम खाममा राखेर टेबलमा राख्न निर्देशन दिए । सबैले त्यहीअनुसार गरे । भिसा प्रक्रियाका लागि छुट्टै फारम भर्नुपर्ने भन्दै हातहातमा फारमसमेत थमाए ।

फारम भर्ने बेला भने टेबलमा राखेका डलरका खाम चौधरी समूहले परिवर्तन गरे । अलिमसहितका १३ युवाले त्यो चाल पाएनन् । 

इटाली र फ्रान्स जाने फारम भर्नमै व्यस्त थिए । फारम भरेर बुझाएपछि भने उनीहरूले डलर राखिएको खाम अलिमसहितलाई नै फिर्ता गरे ।

उनीहरूले जहाँतहीँ खाम खोलेमा कानुनी समस्या हुने भन्दै त्रास देखाएर होटेलमा पुगेपछि मात्रै खाम हेर्न सुझाए । त्यो बेलासम्म पनि उनीहरू इटाली र फ्रान्स पुग्ने सपनामै थिए । आफ्नै देश बंगलादेशका नागरिकलाई विश्वास गरेर आइसकेपछि शंका गर्ने कुरा थिएन ।

जब होटेलको कोठामा पुगे...

मुहम्मद फरहिद हुसेन चौधरीको समूहले भनेजस्तै उनीहरूले सेमिनार हलमा खाम नखोली होटेलमा गए । राति होटेलको कोठामा पुगेर खाम खोलेर हेर्दा त खामभित्र डलर नभएर कागजका खोस्टामात्रै देखे ।

१३ जना नै छाँगाबाट खसेझैँ भए । सबै एक ठाउँमा जम्मा भएर मुहम्मद फरहिद हुसेन चौधरीको समूहलाई ह्वाट्सएपमार्फत सम्पर्क गर्न खोजे । तर, कसैसित सम्पर्क हुन सकेन । 

चौधरीसहितका एजेन्ट पीडित १३ जनाले तीन हजार ५०० सयका दरले ल्याएको डलर लिएर सम्पर्कविहीन भइसकेका थिए । ४५ हजार डलर लिएर एजेन्टहरू भागेपछि इटाली र फ्रान्सको सपना बोकेर नेपाल आएका अलिम मोल्लिकसहितका युवाको सपना एकैछिनमा चकनाचुर भयो ।

सोमबार राति नै ठगिएका उनीहरू दुई दिनसम्म एजेन्टहरूसँगको सम्पर्कमा प्रयासरत रहे । दुई दिनपछि भने आफ्नै देशका एजेन्टले फसाएको निष्कर्षमा पुगे । उनीहरू बुधबार प्रहरीको उपत्यका अपराध अनुसन्धान कार्यालय पुगे । 

विदेशी नागरिक मानवतस्करीको जालोमा परेको निष्कर्ष निकाल्दै कार्यालयले अपराध अनुसन्धान कार्यालयको ‘इन्टिलिजेन्स पिलर’का प्रमुख डीएसपी रोशन खड्का नेतृत्वको टोली परिचालन गर्‍यो ।

खड्काकै टोलीले मुहम्मद फरहिद हुसेन चौधरी समूहका तीनजनालाई बुधबार एयरपोर्टस्थित शिवशक्ति होटेलबाट पक्राउ गर्न सफल भयो । अनुसन्धानकै क्रममा थप दुईजना समेत बिहीबार पक्राउ परेका छन् । उनीहरूको साथबाट प्रहरीले नौ हजार ८५० अमेरिकी डलर, बंगलादेशी ३९ हजार ९०५ र २५ हजार नेपाली रुपैयाँ बरामद गरेको छ ।

प्रहरीको अनुसन्धानका क्रममा उनीहरूले बंगलादेशी नागरिकलाई विभिन्न देश पठाउने भन्दै नेपाल बोलाउने र धाकधम्की दिएर ठगी गर्ने गरेको खुलेको छ । पक्राउ परेकाहरूलाई थुनामा राखेर अनुसन्धान गर्न अदालतबाट म्याद लिएर अनुसन्धान थालिएको कार्यालयका एसपी अंगुर जीसीले जानकारी दिए ।