काठमाडौं । अन्टार्कटिका महादेशको नजिकै पर्ने हर्ड र म्याकडोनाल्ड टापुमा मानिसहरूको बसोबास छैन । यी टापुहरू अस्ट्रेलियाको बाह्य क्षेत्रभित्र पर्छन् । यी ठाउँ पृथ्वीको सबैभन्दा दुर्गम स्थानहरूमध्ये एक भित्र पर्छन् । यी टापुहरू सधैँ हिउँले ढाकिएका हुन्छन् । यहाँ बस्छन् त केवल पेन्गुइन र सिलहरू । विश्वको सबैभन्दा टाढाको ठाउँको रूपमा चिनिने यो स्थानमा पुग्न अस्ट्रेलियाको पश्चिमी तटबाट दुईहप्ते समुन्द्री यात्रा गर्नुपर्छ । 

यी टापुहरू पूर्ण रूपमा निर्जन छन् । अन्तिमपटक मानिसहरूले यहाँ भ्रमण गरेको लगभग १० वर्ष भैसकेको छ । यी टापुहरूमा आर्थिक गतिविधि पनि छैन । हर्ड र म्याकडोनाल्ड टापुहरूमा कुनै मानवबस्ती, उद्योग वा निर्यात योग्य सामान छैन । यहाँबाट अमेरिकामा एउटा पनि वस्तु आयात हुँदैन ।

तैपनि हर्ड र म्याकडोनाल्ड टापु पनि अमेरिकी राष्ट्रपति डोनाल्ड ट्रम्पले अप्रिल २ मा घोषणा गरेको विश्वव्यापी आधारभूत १० प्रतिशत आयात कर लाग्ने देश भित्र परेका छन् । ट्रम्पको घोषणाअनुुसार अस्ट्रेलियाका अन्य बाह्य क्षेत्रहरूसँगै यी टापुहरूलाई अमेरिकामा वस्तुहरू निर्यात गर्दा पनि १० प्रतिशत कर लाग्नेछ ।

यो जानकारी बाहिर आएसँगै अस्ट्रेलियाली प्रधानमन्त्री एन्थनी अल्बानीजले बिहीबार भने, “अहिले त ट्रम्पबाट संसारको कुनै कुना पनि सुरक्षित छैन ।”

यो निर्णयलाई ट्रम्पको विचित्रको व्यापार नीतिको उदाहरण भएको बताउँदै ट्रम्पको यो निर्णयले उनको नीतिको विडम्बना उजागर गर्ने प्रधानमन्त्री अल्बानीजले बताए । द गार्जियनबाट