काठमाडौं । नेपाल सुपर लिग (एनएसएल)को क्लब पोखरा थन्डर्सका मुख्य प्रशिक्षक सुमन श्रेष्ठले प्रतियोगिता र रेफ्रीको स्तरमाथि प्रश्न उठाएका छन् । प्रतियोगितामा बुधबार पोखरा ललितपुर सिटी एफसीविरुद्ध ३–२ ले पराजित भएपछि श्रेष्ठले आयोजकले आफूहरूको तालिकाप्रति ध्यान नदिएको र रेफ्री पनि प्रतियोगिताको स्तरअनुसारको नभएको बताएका हुन् ।

उक्त खेलको ८०औँ मिनेटमा पोखराले गोललाइनबाट क्लियर भएको बलले गोलको मान्यता नपाउँदा पोखराको टेक्निकल जोन आक्रोशित भएको थियो । त्यसको दुई मिनेटपछि ८२औँ मिनेटमा रेफ्री र पोखराका अफिसियलबीच विवाद हुँदा खेल तनावपूर्ण बन्यो ।

पोखराका टिमबाट सुन्दर थापाले गोललाइन बललाई गोल मान्यता नदिएको भन्दै फोर्थ अफिसियल उमेश बिडारीसँग विवादमा उत्रिँदा खेल करिब पाँच मिनेट तनावपूर्ण बनेको हो । बिडारी र थापाबीच धक्कामुक्कीको स्थिति बन्दा छुट्याउन पुगेका प्रतियोगिता निर्देशक सञ्जीव मिश्रलाई समेत थापाले तानेर पोखराको टेक्निकल लाइननजिक भुइँमा लडाएका थिए ।

“के भन्ने अब यति राम्रो टुर्नामेन्ट भइरहेको छ एउटा स्ट्यान्डर्डको एउटा लेभलको त्यो अनुसारको अझै रेफ्रीहरू भइदिँदा यति राम्रो स्ट्यान्डर्ड एनएसएलमा एउटा गरिमामय अझै राम्रो हुन्थ्यो कि मलाई लाग्छ । एउटा सानो मिस्टेकले गर्दाखेरि हाम्रो क्लबको इन्भेस्टमेन्ट रेपुटेसन सबै र तपाईंको दुई तीन करोडको घाटा हुन्छ,” प्रशिक्षक श्रेष्ठले भने, “तपाईंहरूले तालिकामा र अरु अरु टिमको फिक्सचर हेर्दा तपाईंहरूले आफैँ केही हदसम्ममा फिल गर्न सक्नुहुन्छ ।”

प्रतियोगितामा पोखराको यो लगातार दोस्रो हार हो । पोखरा यसअघि पहिलो खेलमा एफसी चितवनसँग २–० ले पराजित भएको थियो ।