काठमाडौं । संयुक्त राष्ट्रसंघ (यूएन)ले आइतबार इजरायली सेनाले १५ प्यालेस्टिनी चिकित्सक तथा आपतकालीन उद्धारकर्ताहरूलाई दक्षिणी गाजामा गोली हानेर हत्या गरेको बताएको छ । 

हत्या गरिएका १५ जनालाई सामूहिक रूपमा एकै ठाउँमा पुरेको यूएनको आरोप छ । यूएनको यो आरोपलाई गम्भीर मानिएको छ । यूएनले सकेसम्म अरुलाई  प्रत्यक्ष दोष लगाउँदैन । 

यूएनका मानवीय सहयोग प्रमुख टोम फ्लेचरले सामाजिक सञ्जाल एक्समा लेख्दै १५ प्यालेस्टिनी चिकित्सक तथा आपतकालीन उद्दरकर्ताहरू ज्यान बचाउने प्रयासमा इजरायली सेनाद्वारा मारिएको बताएका छन् । उनले यस विषयमा इजरायलको जवाफ र मृतकहरूप्रति न्याय माग गरेको द न्यूयोर्क टाइम्सले जनाएको छ ।

रेड क्रिसेन्ट, अन्तर्राष्ट्रिय रेड क्रस कमिटी र संयुक्त राष्ट्रसंघले मारिएका सबै व्यक्तिहरू मानवीय कार्यकर्ता भएको र उनीहरूलाई लक्षित गरेर कहिल्यै आक्रमण गर्न नहुने बताएको छ । रेड क्रिसेन्टले यो घटनालाई हत्या र युद्ध अपराध भएको भन्दै जिम्मेवारी लिन माग गरेको छ ।

तर, इजरायली सेनाका प्रवक्ता लेफ्टिनेन्ट कर्नल नादाभ शोशानीले सोमबार सामाजिक सञ्जाल एक्समा मारिएकाहरूमध्ये नौजना प्यालेस्टिनी उग्रवादी भएको दाबी गरे । उनका अनुसार इजरायली सेनाले एम्बुलेन्समा आक्रमण गरेको नभएर केही गाडीहरू अँध्यारोमा हेडलाइट वा इमर्जेन्सी सिग्नल नबाली इजरायली सैनिक क्षेत्रतर्फअगाडि बढ्दै गरेकाले सेनाले गोली चलाएको बताएका छन् । 

इजरायली सेनाका प्रवक्ताले जवाफ दिँदै यूएनका अधिकारीहरूले ती गाडीहरूमा उद्धारको वाहन भनेर स्पष्ट चिह्नहरू राखिएको भन्दै इजरायली सेनाका दाबी खारेज गरेका छन् । द न्यूयोर्क टाइम्स