काठमाडौं । महिलाहरूको स्वास्थ्य एवं फिटनेसमा सचेतना जगाउने उद्देश्यले आगामी चैत ९ गते ‘काठमाडौं पिंक केयरएथन’ हुने भएको छ । लेजर पोर्ट नेपालले गर्न लागेको केयरएथनमा महिलाहरूको दौड, जुम्बालगायत विभिन्न कार्यक्रम हुनेछन् ।

जुनसुकै उमेर समूहका महिलाहरूले सहभागिता जनाउन सक्ने यस इभेन्टको मुख्य उद्देश्य सधैँ घरायसी काम र दैनिकीमा व्यस्त रहने महिलाहरूलाई आफ्नो स्वास्थ्यका लागि पनि समय निकाल्न प्रेरित गर्नु रहेको आयोजक संस्था लेजर पोर्ट नेपालका अध्यक्ष नमराज जोशीले बताए । 

आयोजकले आज राजधानीमा आयोजना गरेको पत्रकार सम्मेलनमा दिएको जानकारी अनुसार, पिंक केयरएथनमा यसपटक दुई हजार ५०० देखि तीन हजार महिला सहभागी हुने अपेक्षा गरिएको छ । 

कलाकार उषा रजकलाई काठमाडौं पिंक केयरएथनकाे गुडविल एम्बासडेटर घाेषणा गरिएकाे छ ।

यसअघि, काठमाडौं पिंकाथनको नाममा हुने गरेको यो कार्यक्रम यसपटक अझ नेपालीपन झल्किने गरी काठमाडौं पिंक केयरएथन नाममा आयोजना गर्न लागिएको हो । 

लेजर पोर्टले सन् २०१७ देखि २०१९ सम्म तीन वर्ष काठमाडौं पिंकाथन आयोजना गरेको थियो ।